«Марказий студия» кўрсатуви бошловчилари «Олтин кабутар—2019» мукофотини ўз ихтиёри билан «Йўловчи» кўрсатувига тақдим қилди (видео)

«Халқлар дўстлиги» санъат саройида телевидение, кино, санъат ва маданият соҳаси вакиллари учун «Ёшлар» ва «Менинг юртим» телеканаллари томонидан ташкил этилган «Олтин кабутар—2019» тақдимоти бўлиб ўтди.

Тақдимотда «Энг яхши кўрсатув» номинациясида «Марказий студия» кўрсатуви ғолибликни қўлга киритди.

Саҳнада ташкилотчиларнинг камчиликлари ҳақида гапирган Сарвар Баҳодировнинг гап-сўзлари катта шов-шувларга сабаб бўлган эди.

Кўрсатув бошловчилари Амирхон Умаров ҳамда Сарвар Баҳодиров мукофотни Azon TV’нинг «Йўловчи» кўрсатувига тақдим қилди. Бу ҳақда «Марказий студия» кўрсатуви бошловчилари «Дарё» мухбири Феруз Муҳаммадга берган интервьюсида маълум қилди.

Залдаги фикримни эшитган бўлсангиз керак. Агар мукофотни ‘Йўловчи’ кўрсатуви олганида ҳам биз хафа бўлмас эдик. Чунки дин тарғиботи йўлида қилинаётган ҳар қандай ҳаракатни биз маъқуллаганмиз, олқишлаганмиз. Бу йўлда ҳаттоки биз ҳам ҳаракат қилишимиз керак.

Мана саҳнада айтилган гап, ҳаётга кўчди, бизга ‘Дўстона ташаккурнома’ беришди. Биз мукофотни олдик, дин тарғиботи йўлида хизмат қилаётгани учун бу мукофотни ‘Йўловчи’ кўрсатувига олиб бориб топшириб қайтдик. Бу ташаббус раҳбаримиз ва ўзимиздан чиқди.

Бунга ижтимоий тармоқлардаги муҳокама сабаб эмас. Агар шу сабаб дейишса, саҳнадаги гапимни эслашсин. Саҳнада ‘Йўловчи’ олса ҳам хафа бўлмаймиз деган фикрни билдирганман.

Сарвар Баҳодиров, «Марказий студия» кўрсатуви бош муҳаррири ва бошловчиси