Наманганда ҳам Президент мактаби очилди (фото)

Наманган шаҳрида Президент мактабининг тантанали очилиш маросими бўлиб ўтди. Бу ҳақда «Дарё» мухбири Азизбек Абдувалиев хабар бермоқда.

Маросимни бошлаб берган вилоят ҳокими Хайрулло Бозоровга кўра, вилоят миқёсида 8 мингга яқин ёш Президент мактаби ўқувчиси бўлиш мақсадида имтиҳон топширган бўлса, улардан энг салоҳиятли 144 нафари саралаб олинган.

— Наманган учун бугун тарихий кун десак муболаға эмас. Зеро, вилоятдаги бошқа мактаблар учун маёқ вазифасини ўтайдиган таълим муассасаси ишга тушмоқда. Ёшларимиз орасида истеъдодлилари кўп. Президент мактаби эса уларнинг иқтидорини янада сайқал топтиришга хизмат қилади, — деди вилоят ҳокими.

Вилоят халқ таълими бошқараси ахборот хизматининг қайд этишича, Наманган шаҳридаги Президент мактабига юқори малакали хорижий мутахассисларни ишга ёллаш бўйича хизмат кўрсатувчи Teachaway (Канада) ва TIC Recruitment (Буюк Британия) рекрутинг компаниялари томонидан 11 нафар чет эллик юқори малакали мутахассис танлаб олинди.

Шунингдек, 20 нафар малакали маҳаллий ўқитувчи жалб қилинди.

Таълимда STEAM йўналишига оид дарслик ва ўқув қўлланмалари Cambridge University Press, Oxford University Press ва Collins каби нуфузли нашриётлар томонидан олиб келинди.

144 нафар ўқувчи таҳсил оладиган Наманган шаҳридаги Президент мактаби 16 та электрон доска, 36 та компьютер тўплами, замонавий ахборот коммуникация воситалари ва компьютер технологиялари билан таъминланган. Замонавий спорт зали ва бассейн, 6000 га яқин китоб фондига эга кутубхона ўқувчилар ихтиёрида.

Шунингдек, мактабда чет эллик мутахассислар учун 15 ўринли шинам меҳмонхона ҳам мавжуд.

Тадбирда Ўзбекистон Ёшлар иттифоқи раиси Алишер Саъдуллаев, Президент, ижод ва ихтисослаштирилган мактабларни ривожлантириш агентлиги директори Сарвар Бобохўжаев, ўқувчилар номидан эса Жавоҳир Исаев ва Сарвиноз Ҳабибуллаева сўзга чиқди.

Наманган шаҳридаги Президент мактабининг илк қўнғироғи жаранглади. Шундан сўнг меҳмонлар мактаб фаолияти билан танишиб, ўқув жараёнларини кузатди.