2019 йилнинг ўтган даври давомида ҳарбий шаҳарчалар ҳудудида 16 та тадбиркорлик субъекти ташкил қилиниб, 267 та иш ўринлари яратилган ҳамда ушбу иш ўринларининг 145 тасига ҳарбий хизматчиларнинг иш билан банд бўлмаган оила аъзолари жойлаштирилди. Бу ҳақда Ҳарбий прокуратура матбуот хизмати «Дарё»га хабар берди.
Масалан, Андижон ҳарбий прокуратураси томонидан Андижон вилояти ҳарбий-маъмурий сектори билан ҳамкорликда Андижон гарнизонидаги ҳарбий шаҳарча ҳудудидан 1,0 гектар ер майдони ажратилиб, ушбу ҳудудда «Ал-Ҳаким» МЧЖ текстиль корхонасига қарашли тикувчилик цехи ташкил этилган ва тикувчилик цехи 2019 йил сентябрь ойида фаолиятини бошлаб, 150 кишилик иш ўрни яратилиб, маҳаллий аҳоли билан биргаликда ҳарбий хизматчиларнинг 37 нафар оила аъзоси доимий иш билан таъминланган. Шунингдек, ҳозирда мазкур ҳарбий шаҳарча ҳудудидан қўшимча 150 кишилик тикувчилик цехи биноси қурилиши амалга оширилмоқда.
Таъкидлаш жоизки, Наманган ҳарбий прокуратураси томонидан амалга оширилган ишлар натижасида биргина 2019 йилнинг август—ноябрь ойларида ҳарбий шаҳарчалар ҳудудида 5 та тадбиркорлик субъекти ташкил этилиб, жами 34 нафар ҳарбий хизматчининг оила аъзоларининг бандлиги таъминланган.
Бундан ташқари, Урганч ҳарбий прокуратураси томонидан Хоразм вилояти Шовот туман ҳокимлиги билан ҳамкорликда Мудофаа вазирлигига қарашли ҳарбий қисм ҳарбий хизматчисининг турмуш ўртоғи Ш.Нарзуллаевага «Шоҳизамин Ҳаёт» оилавий корхонасининг ташкил этилишида, ушбу корхона фаолияти учун Шовот тумани «Қият» ҚФЙ ҳудудидан 2 гектар ер майдони ажратилишида ҳамда ушбу корхонанинг парранда етиштириш билан боғлиқ фаолиятини бошлаши учун «Микрокредитбанк» АТБ Хоразм вилояти филиалидан 200 миллион сўм миқдорида имтиёзли кредит ажратилишида амалий ёрдам кўрсатилган ҳамда ушбу корхона 2019 йил ноябрь ойида фаолиятини бошлаб 5 нафар ҳарбий хизматчининг оила аъзоси иш билан таъминланган.
Фарғона ҳарбий прокуратурасининг ташаббуси ва амалий ёрдами билан Фарғона шаҳридаги ҳарбий шаҳарчада бўш турган бир қаватли бинонинг хоналари таъмирдан чиқарилиб, тадбиркорлар жалб қилинган ҳолда, «тикув цехи», «Сартарошхона» ва «оёқ кийим таъмирлаш» хонаси ташкил қилиниб, уларнинг фаолияти йўлга қўйилиб, 16 та янги иш ўрини яратилишига ва ушбу иш ўринларига ҳарбий хизматчиларнинг меҳнат билан банд бўлмаган оила аъзолари жалб қилинишига эришилган.
Шунингдек, ушбу ҳарбий шаҳарчада ҳарбий прокуратуранинг кўмаклашувида ҳарбий хизматчиларнинг яшаш шароитларини яхшилаш, уларни маиший техникаларга бўлган эҳтиёжларини қондириш мақсадида имтиёзли кредит асосида товарларни харид қилиш имкониятлари яратилган «Тинчлик фаровон бизнес» маиший техникалар дўкони ташкил этилиб, 2 нафар нафақада бўлган ҳарбий хизматчи иш билан таъминланган.
Ҳозирда мазкур савдо дўконида Samsung, Artel, Shivaki ва Avalon русумдаги маиший техникалар келтирилиб, имтиёзли нархларда кредит асосида ҳарбий хизматчилар ва уларнинг оила аъзоларига сотилмоқда.
Ўзбекистон Республикаси Ҳарбий прокуратураси органлари томонидан ушбу йўналишдаги ишлар давом эттириб борилмоқда, дейилади хабарда.
Изоҳ (0)