23 ноябрь куни Тошкент шаҳар Сергели туманида иккита давлат мактабгача таълим ташкилоти (МТТ)нинг очилиш маросими бўлиб ўтди. Бу ҳақда Мактабгача таълим вазирлиги матбуот хизмати «Дарё»га хабар берди.
Жами 370 нафар болани тарбиялашга мўлжалланган ушбу мактабгача таълим ташкилотининг очилиш маросимида вазир Агриппина Шин иштирок этди.
Сергели туманидаги ушбу мактабгача таълим ташкилотлари турар жой биноларининг биринчи қаватида жойлашган.
«Сергели тумани қурилиш зичлиги ва ёш оилаларнинг кўплиги билан ажралиб туради. Мактабгача таълим вазирлиги мавжуд имкониятлардан фойдаланган ҳолда аҳолини зарур ижтимоий инфратузилма билан таъминлашга ҳаракат қилмоқда. Биз янги объектларни қурмоқдамиз ва мавжудларининг имкониятларини оширмоқдамиз. Янги МТТ турар жой биноларининг биринчи қаватида жойлашган бўлиб, у ота-оналар ва болалар учун қулайдир. Ҳаммаси бўлиб иккита мактабгача таълим муассасасида 7 та кунлик гуруҳлар ва 4 та қисқа муддатли гуруҳлар икки сменада фаолият юритади», — дейди мактабгача таълим вазири Агриппина Шин.
Озиқ-овқат маҳсулотлари икки хил тарзда ташкил қилинади:
— ауцорс тарзида жалб қилинувчи фирмаларга МТТ ҳудудида овқат тайёрлаш учун уларга ошхоналар, жиҳозлар ва бошқа ускуналардан фойдаланиш имкониятини бериш;
— кейтеринг, яъни тайёр овқатни МТТга етказиб бериш.
Шунингдек, иккита мактабгача таълим муассасасининг очилиши педагог ва ёрдамчи ходимлар учун қўшимча 41 та иш ўрнини яратади. Иккала МТТ ҳам 2019 йил декабрь ойида ишга тушади.
Изоҳ (0)