Навоийда бахтсиз ҳодиса туфайли жиддий жароҳат олган устага ёрдам кўрасатилди. Бу ҳақда Навоий вилояти ФВБ матбуот хизмати «Дарё»га хабар берди.
21 ноябрь куни соат 10:30 да вилоят ФВБ тезкор навбатчисига Навоий шаҳри С.Айний кўчаси 71А-уйнинг 26-хонадонида иссиқлик қувурини таъмирлаётган 1971 йилда туғилган фуқаро Ғ.Э ўзининг эҳтиётсизлиги оқибатида уч метр чуқурликдаги бетон ертўлага танасининг орқа қисми билан йиқилганлиги ҳақида хабар қилган.
Оғир тан жароҳати олган фуқаро ёрдам сўраб ФВБга мурожаат қилган.
Тезкор маълумотга асосан воқеа жойига зудлик билан қутқарув отряди қутқарувчилари ва тез тиббий ёрдам ходимлари етиб борган. Олинган тан жароҳати натижасида мустақил ҳаракатлана олмаётган Ғ.Э махсус тиббиёт замбилига жойлаштирилган ва арқонлар ёрдамида ертўладан олиб чиқилиб, биринчи тиббий ёрдам кўрсатилган.
Фуқаро Ғ.Э бош мия ёпиқ жароҳати билан РШТТЁМ Навоий филиалига ётқизилган.
Изоҳ (0)