Ўзбекистон давлат жисмоний тарбия ва спорт университетида талабаларга стипендия берилмаётганлиги тўғрисида ижтимоий тармоқларда тарқалган хабарларга Олий ва ўрта махсус таълим вазирлиги матбуот хизмати муносабат билдирди.
Қайд этилишича, мазкур ҳолат вазирлик томонидан тезкор равишда ўрганиб чиқилди. 2019—2020-ўқув йилидан бошлаб талабаларга тўловларни амалга оширишда қулайлик яратиш, аҳолининг кенг қатлами учун олий таълимнинг ҳаммабоплигини таъминлаш мақсадида тўлов-контракт қиймати миқдорлари икки хил кўринишда – «стипендияли» ва «стипендиясиз» этиб белгиланди.
Университетда тўлов-шартнома асосида ўқийдиган талабаларга стипендия тайинлаш ва беришдаги кечикишлар ўз навбатида талабалар томонидан тўловларни турли миқдорда ва вақтда амалга оширилиши билан боғлиқ.
Ҳозирда барча ташкилий масалалар якунига етказилди ва тўлов-шартнома асосида ўқийдиган талабаларнинг пластик карталарига стипендия ўтказиб берилган. Стипендиянинг нақд пул қисми эса, 18 ноябрь — душанба кунидан тарқатилиши маълум қилинди.
Вазирлик хабарига қолдирилган изоҳлардан маълум бўлишича, Тошкент молия институти, Тошкент юридик университети, Ўзбекистон давлат жаҳон тиллари университети, Тошкент ахборот технологиялари университети ва пойтахт ҳамда вилоятлардаги бошқа олий таълим муассасаларида ҳам стипендия тайинлаш ва тўлаш билан боғлиқ муаммолар мавжуд.
Изоҳ (0)