Аввалроқ, Қозоғистон Миллий гвардияси бош қўмондони генерал-лейтенант Руслан Жаксиликов бошчилигидаги делегациянинг Тошкентга ташрифи давоми Ўзбекистон Миллий гвардияси қўмондони генерал-полковник Баҳодир Тошматов билан учрашгани ҳақида хабар берилганди. Ташрифнинг иккинчи куни делегация Чирчиқ дала ўқув полигонида бўлиб, Миллий гвардия тезкор ҳаракатланувчи бўлинмаларининг террорчи гуруҳларга қарши курашдаги амалиётини кузатди. Бу ҳақда Миллий гвардия матбуот хизмати «Дарё»га маълум қилди.
Таъкидланишича, шу билан бирга меҳмонлар инновацион ўқ отиш машғулотларида ҳам қатнашган.
«Мен Ўзбекистон Миллий гвардияси қўмондонига таклиф этгани учун ўз миннатдорчилигимни билдирмоқчиман. Биз биродарлик алоқаларини қайта йўлга қўйиб, ҳамкорликда ўқувларни ташкил этиш масаласини кўриб чиқмоқдамиз. Ўзбекистон Миллий гвардияси ташкил топганига қарийб икки ярим йил бўлса-да, қисқа вақт ичида жуда катта ҳажмдаги ишлар амалга оширилганидан ҳайратда қолдим. Бу, албатта, Миллий гвардия қўмондонлиги ва бутун шахсий таркибнинг залворли меҳнати самараси эканлигини тушунаман. Бу юқори профессионалликдан далолатдир. Биз ҳар доим шахсий таркибни, аввало, ҳаракатларидаги профессионаллик, хизматга ва ҳарбий интизомга бўлган муносабатига кўра баҳолаймиз», — дейди генерал-лейтенант Руслан Жаксиликов.
Шунингдек, делегация Миллий гвардия ҳарбий қисмларидан бирига ташриф буюриб, моддий-техник база, замонавий қурол-яроғлар, фахрий қоровул ва отлиқ эскадрон чиқишлари ҳамда ҳарбий хизматчиларнинг жисмоний ва жанговар тайёргарлиги, шунингдек, «Темурбеклар мактаби» ҳарбий-академик лицейида ўқувчилар учун яратилаётган шарт-шароитлар ва қўриқлаш хизматида жорий этилаётган инновацион технологиялар натижасида эришилаётган ютуқлар билан танишди.
Изоҳ (0)