Ўзбекистонлик велоспортчи Мурод Холмуродов Токио—2020 Олимпиадасига йўлланма олди. Бу ҳақда Ўзбекистон Миллий олимпия қўмитаси матбуот хизмати маълум қилди.
Холмуродов апрель ойида Тошкентда ўтказилган велошоссе бўйича Осиё Чемпионатида бешинчи ўринни қўлга киритган эди. Айнан ушбу натижа спортчи учун Олимпиада эшигини очди.
Сабаби ундан юқори натижа қайд этган спортчилар Жаҳон Чемпионати орқали Олимпиада йўлланмасига эга бўлди. Токио—2020 Холмуродовнинг фаолиятидаги иккинчи Олимпиада бўлади. Ўзбекистонлик спортчи аввал 2012 йил Лондон Олимпиадасида ҳам иштирок этганди.
Шу тариқа Токио Олимпиадасига лицензия қўлга киритган ўзбекистонлик спортчилар сони 14 тага етди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)