Футбол бўйича Ўзбекистон терма жамоаси 14 ноябрь, пайшанба куни ЖЧ—2022 мусобақаси иккинчи саралаш босқичи 5-тури доирасида Саудия Арабистонига қарши майдонга тушади.

Фото: «Дарё»

Ўйиндан олдин Ўзбекистон терма жамоаси устози Вадим Абрамов матбуот анжуманида иштирок этди, дея хабар беради «Дарё» мухбири.

Ўйин ҳақида

— Жуда ҳам муҳим ўйин. Гуруҳ пешқадамлиги учун кураш иккала жамоа ўртасида кечади деб ўйлайман. Ҳозирда биз биринчи ўриндамиз ва буни сақлаб қолишимиз лозим. Саудия — жуда жиддий рақиб. Уларга қарши яхши тайёргалик олиб бора олдик деган фикрдаман. Ўз майдонимизда ўйнаймиз. Омад ҳам бизда томонда бўлиши ва ғалаба қозонишга умид қиламан.

Лутфулла Тўраевнинг ҳолати ҳақида

— Қирғизларга қарши ўйинда у захирадан майдонга тушди ва яхши ҳаракат қилди. Ҳеч нарсани бузиб қўйгани йўқ. Унинг жамоада бўлиши фойдалироқ деб ўйлайман. Тўраев тажрибали футболчи, шу боисдан ҳам у бошқа ёш ўйинчиларга намуна бўла олади.

Эрве Ренарнинг Саудия Арабистони термасига ўз услубини сингдира олгани ёки аксинчалиги ҳақида

— Бу саволни меҳмонларнинг журналистларига берган маъқул. У тажрибали мураббий. Африка термаларида ҳам яхши ишлаган.

Ҳимоя чизиғи ҳақида

— Ўз камчиликларимизни биламиз. Ҳозир улар ҳақида гапирмоқчи эмасмиз. Эртанги баҳсдан сўнг улар яна кўринади. Шундан сўнг улар устида яна иш олиб борамиз.

Сардор Рашидов ҳақида

— Албатта, Рашидовни кузатиб боряпмиз. Тўғри, у сўнгги ўйинда иккита гол урди. Аммо энди ҳамма гол урган ўйинчиларни чақира олмаймиз. Аввалроқ Сардорнинг «Қатар СК» клубида энди фаолият бошлаганини ва у клубга яхши ўрнашиб олиши кераклиги ҳақида айтгандим. Ҳозир ҳам шуни қайтараман. Унинг учун хурсандмиз. Олдиндаги иккита ўйиндан сўнг катта танаффус вужудга келади. Ўша вақтда уни ҳам чақиришимиз мумкин. Ҳозир эса чақириб, захирада қолдиришдан фойда йўқ деб ҳисоблайман. Бундан ташқари унинг ўрнида ҳаракат қиладиган футболчи ҳам кучсиз эмас.

Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!