Хитойнинг Ухан шаҳри мезбонлик қилаётган замонавий бешкураш бўйича Осиё-Океания чемпионати доирасида Ўзбекистон эркаклар терма жамоаси аъзоси Александр Савкин 2020 йил Токиода бўлиб ўтадиган Олимпия ўйинларига йўлланма қўлга киритди. Бу ҳақда Миллий олимпия қўмитаси хабар берди.
Таъкидлаб ўтиш керак, ўзбек спорти тарихида бундай кўрсаткич биринчи бор қайд этилмоқда. Аввалроқ аёллар ўртасида Алисе Фахрутдинова саралаш босқичида учинчи ўринни эгаллаб, Олимпия ўйинларига йўлланма қўлга киритган эди. Мусобақа якунига кўра, ўзбекистонлик спортчилар жамоавий рейтингда бешинчи поғонани эгаллаб, Олимпия ўйинларининг иккита лицензиясига сазовор бўлди.
Қайд этиш жоиз, Ўзбекистон терма жамоаси ушбу спорт турида ўзбек спорти тарихида илк бор Олимпия ўйинларига йўлланма олди. Мазкур мусобақада Осиё ва Океания минтақасининг энг кучли 12 терма жамоасидан аёллар ўртасида 26, эркаклар ўртасида эса 32 нафар сара бешкурашчилар баҳс олиб борди.
Мусобақа якунида терма жамоаларнинг кучли бешлиги қуйидаги кўринишга келди:
- Жанубий Корея
- Хитой
- Қозоғистон
- Япония
- Ўзбекистон
Маълумот учун, Риода бўлиб ўтган 2016 йилги Олимпия ўйинларида 15 та спорт тури бўйича жами 70 нафар ўзбекистонлик спортчи иштирок этганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)