Тошкент шаҳар божхона бошқармасининг «Бош почтампт» ташқи иқтисодий фаолият божхона пости ходимлари томонидан почта жўнатмалари орқали қонунга хилоф равишда таркибида психотроп моддалар мавжуд бўлган дори воситалари ҳамда наркотик моддаларни Ўзбекистонга киришининг олди олинди. Бу ҳақда Давлат божхона қўмитаси матбуот хизмати хабар берди.

Фото: Давлат божхона қўмитаси матбуот хизмати

Х.Н., Т.А. ва А.Ф. исмли фуқаролар номига хориждан юборилган почта жўнатмалари божхона назоратидан ўтказилганида, божхона декларациясида кўрсатилмаган, таркибида психотроп моддалари мавжуд бўлган 150 дона дори воситалари борлиги аниқланган.

Шунингдек, фуқаро У.Т. номига юборилган почта жўнатмасида 5 дона марихуана ўсимлигининг уруғлари борлиги ҳам маълум бўлган.

Ҳозирда мазкур ҳолатлар юзасидан божхона органлари томонидан суриштирув ҳаракатлари давом эттирилмоқда.

«Гиёҳвандлик воситалари ва психотроп моддалар тўғрисида»ги қонунининг 17-моддасида гиёҳвандлик воситалари, психотроп моддалар ва прекурсорларни почта жўнатмаларида, шу жумладан, халқаро почта жўнатмаларида жўнатиш тақиқланиши кўрсатиб ўтилган.