“Qoraqalpog‘iston” temir yo‘l chegara bojxona postidan fuqaro J.V. jami 66 litr viskini yashirincha olib o‘tmoqchi bo‘ldi, deb xabar bermoqda Davlat bojxona qo‘mitasi matbuot xizmati.

Foto: Davlat bojxona qo‘mitasi matbuot xizmati

Fuqaro bojxona xodimining og‘zaki so‘rovida aytmasdan hamda yo‘lovchi bojxona deklaratsiyasida ko‘rsatmasdan poyezd vagonining tepa qismi(plafon)ga, shuningdek, vagon pechkasining pastki qismida yog‘ochlar ostiga xufyona tarzda yashirgan holda, umumiy qiymati 33 million so‘mlik 66 litr viskilarni tijorat maqsadida olib kelayotganligi aniqlangan.

Hozirda mazkur holat bo‘yicha bojxona organlari tomonidan surishtiruv ishlari amalga oshirilmoqda.

Bundan avval Bojxona qo‘mitasi o‘tkazgan tezkor tadbirda 39 480 dona “Tramadol”ning noqonuniy aylanmasiga chek qo‘yilgan, 2 milliard so‘mlik antikvar boyliklarning mamlakatdan olib chiqib ketilishi to‘xtatilgan, 6,1 milliard so‘mlik matolar belgilanmagan joyda saqlanayotgani aniqlangandi.