Трамп Украина президенти билан суҳбати матнини жонли эфирда ўқиб бермоқчилигини билдирди

АҚШ президенти Дональд Трамп мамлакат фуқароларига Украина президенти Владимир Зеленский билан телефон орқали суҳбати стенограммасини ўқиб бермоқчи. Бу ҳақда у Washington Examiner нашрига берган интервьюсида маълум қилди, дея хабар беради «Korrespondent.net».

Унинг айтишича, Зеленский билан «яхши» суҳбат бўлган, шу сабабли у мазкур мулоқот матнини ўзи ўқиб бериш ниятида. Трамп бу тўғридан-тўғри эфирда бўлиши мумкинлигини истисно этмади.

Шунингдек, Оқ уй раҳбари импичмент иши доирасида Демократик партия вакиллари билан ҳамкорлик қилиш ниятида эмаслигини билдирди. Трамп демократларнинг текширувини «фирибгарлик ва алдов» деб атади.

Маълумот учун, импичмент жараёни Трампнинг Украина президенти Владимир Зеленский билан мулоқоти туфайли бошланди. АҚШ етакчиси Зеленскийдан бўлажак президентлик сайловларида Трампнинг асосий рақиби саналаётган Жо Байденнинг Burisma компанияси раҳбарларидан бири бўлган ўғлига қарши текширув бошлашни сўраганди.