АҚШ президенти Дональд Трамп ва унинг турмуш ўртоғи Мелания расман асосий яшаш жойини ўзгартирди — улар Нью-Йоркдан Флоридага кўчиб ўтган. Бу ҳақда Meduza хабар бермоқда.
Палм-Бич шаҳри округ суди ҳужжатларида қайд этилишича, сентябрь ойи охирида президентнинг оиласи яшаш манзилини Манхеттендан (Нью-Йорк) Флоридадаги Трампга тегишли Mar-a-Lago Club курортига ўзгартирган.
Давлат раҳбарига яқин манба буни «солиқлар нуқтаи назаридан қабул қилинган қарор» сифатида баҳолаган.
Трампнинг ўзи ҳам Twitter’даги саҳифасида Палм-Бичга кўчиб ўтганини тасдиқлади ва буни қуйидагича изоҳлади:
«Мен Нью-Йорк ва унинг аҳолисини қадрлаганман, бундан кейин ҳам шундай бўлади. Бироқ ҳар йили шаҳарга миллионлаб доллар маҳаллий солиқларни тўлашимга қарамай, шаҳар ва штатнинг сиёсий етакчилари мен билан ёмон муносабатда бўлди. Бунақаси камдан-кам бўлган».
АҚШ президенти бу билан нимани назарда тутаётганига аниқлик киритмаган.
Изоҳ (0)