Фарғона вилоятининг Риштон туманида Тожикистон ҳукумати ҳисобидан 200 ўринли мактабгача таълим ташкилоти (МТТ) қурилмоқда. Бу ҳақда Фарғона вилояти ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Дилшоджон Ҳожиметов «Дарё» мухбири Мусулмонбек Иброҳимовга берган интервьюсида айтиб ўтди.
Ҳоким ўринбосари Ҳожиметовнинг сўзларига кўра, Тожикистон ҳукумати ҳисобидан Риштон туманида умумий қиймати 4 миллиард сўмга тенг бўлган МТТ бунёд этилмоқда.
«Биз Тожикистонда қандай мактаб қуриб берган бўлсак, улар ҳам бизга шундай боғча қуриб бермоқда. Муассаса қурилишида тожикистонлик усталар билан бирга ўзбекистонлик қурувчилар ҳам меҳнат қилмоқда. Икки қаватли, 200 ўринга мўлжалланган МТТни 2020 йил сентябрида фойдаланишга топшириш режалаштирилган. Болалар боғчасини қуриш ишлари тўлиқ Тожикистон ҳукумати томонидан молиялаштирилмоқда», – деди Фарғона вилояти ҳокими ўринбосари.
Аввалроқ Ўзбекистон ҳукумати ҳисобидан Тожикистоннинг Сўғд вилояти Спитамен туманида 630 ўринли мактаб, Хатлон вилоятининг Қубодиён туманида эса 200 ўринли шифохона қурилиши ҳақида хабар берилган эди. Ўз навбатида Тожикистон томони Самарқандда 640 ўринли мактаб ва Риштонда болалар боғчаси қуриш режасини маълум қилган эди.
Изоҳ (0)