Тошкентда 3 аёлни алдаган эркак 5 йилга қамалди. У аёллардан бирига уйланишга, 2 нафарини келин қилишга ваъда берган

Тошкентда 6 марта судланган шахс яна жиноятга қўл урди. Бу ҳақда MY5 телеканалининг «Марказий студия» кўрсатувида маълум қилинди.

У 2018 йилда Пенсия жамғармасининг Мирзо Улуғбек тумани бўлимига бориб, инспектор аёлнинг ишончига киради.

«Сизни укамга келин қилмоқчиман, менга узугингизнинг ўлчами керак», деб унинг 800 000 сўмлик узугини олиб кетади.

Унинг кейинги манзили тумандаги санитария-гигиена ҳамда касб касалликлари институти бўлади. У ерда илмий амалиёт ўтаётган бир аёлнинг ҳам ишончига киради. Унга «Сизга уйланаман, бўйнингиздаги тақинчоқни беринг, шунга ўхшашини совға қиламан», дейди ҳамда тақинчоқни олиб кетади.

Эркак учинчи қизнинг олдига бориб, «Сизни яқинларимдан бирига олиб бермоқчиман, ойимга расмингизни кўрсатмоқчиман, телефонингизни берсангиз кўчада турган онамга расмингизни кўрсатиб келаман», деб унинг 1 миллион сўмлик телефонини олиб кетади. У телефонни бозорга олиб бориб, 400 минг сўмга сотади.

Эркак умумий ҳисобда биринчи марта 800 000 сўмлик узукни, иккинчи марта 3 миллион сўмлик тақинчоқни, учинчи марта 1 миллион сўмлик телефонни ўғирлаган.

Фуқарога нисбатан 5 йилга озодликдан маҳрум қилиш жазоси тайинланди.