Қарши муҳандислик-иқтисодиёт институтининг бир гуруҳ талабалари «Дарё»га мурожаат йўллаб, адолатсизликлар қурбони бўлишаётгани ва 160 нафар талаба ўқитувчининг шахсий адовати сабаб курсдан қолдирилганидан нолишди.
Мурожаат муаллифларининг таъкидлашича, курсдан қолдирилган талабаларнинг айримлари 500, 800 ва ҳатто 1000 долларгача пул бериб, ишини ҳал қилмоқда.
Институтда бўлиб вазиятни ўрганган «Дарё» мухбири Отабек Қўлдошевнинг ёзишича, курсдан қолдирилган талабалар 160 нафар эмас, 105 нафар кишини ташкил этади.
— Курсдан қолдирилишимизнинг сабаби кўп дарс қолдирганимиз экан, — дейди собиқ талабалардан бири Маъмур Тиловов. — Бизга ўтилган фанларни ўзлаштиролмагансизлар дейишяпти-ю, аммо асосий сабаб дарс қолдирганимиз экан.
Маъмур Тилововнинг айтишича, у бир семестр давомида 90 соат дарс қолдирган бўлиб, 9 та фандан академик қарздорлиги мавжуд.
— 105 нафар талаба кўп дарс қолдиргани учун эмас, ўтилган фанларни ўзлаштиролмагани боис курсдан қолдирилди, — дейди институт ахборот хизмати раҳбари Зебинисо Назирова. — Аксарият талабалар семестр давомида ҳеч қайси фанидан ўтолмаган.
— Агар талабанинг курсдан қолдирилишига кўп дарсларга келмагани сабаб бўлса, 105 нафар талаба аллақачон курсдан қолиб кетган бўларди, — дейди фойдали қазилма конлари геологияси ва разведкаси кафедраси мудири Зафар Суннатов.
Маълум қилинишича, курсдан қолдирилган 105 нафар талабанинг 42 нафари Улуғбек Панжиев раҳбарлигидаги «Нефть-газ конлари геологияси, қидирув ва разведкаси» факультети талабаси ҳисобланади.Зафар Суннатовнинг маълумот беришича, талаба бир семестр давомида 74 соатдан кўп дарс қолдирса, бу уни ўқишдан четлаштиришга сабаб бўлиши мумкин.
Курсдан қолдирилган талабалар Телегарам ижтимоий тармоғида «Адолат бўлсин» деб номланган канал очиб, кафедра мудири Зафар Суннатовни ёзги семестрдаги имтиҳон натижаларини адолатсиз баҳолагани ва шахсий адовати туфайли 160 нафар талабани ноҳақ курсдан қолдирганидан шикоят қилади.
— Талабаларга қаттиққўл бўлишимиз табиий, — дейди Зафар Суннатов. — Қилмиши учун жазоламасак, унинг нотўғри хатти-ҳаракатига жим қараб турсак, бу хато бўлади. Талабаларимиз орасида ҳатто гуруҳ журналини ўғирлаб, йўқ қилиб юборганлари ҳам топилди. Шу боисдан койидик, уришдик. Тўғри йўлга солишга уриндик. Мана шу қаттиққўллимизни шахсий адоват сифатида баҳолашса, унда хато қилишади.
Зафар Суннатов мазкур факультетдаги курсдан қолдирилган 42 нафар талаба билан ҳеч қачон шахсий масалада мулоқотга киришмаганини айтмоқда.
— Курсдан қолдирилган талабалар билан шахсий масала юзасидан ёки дарсдан ташқари мавзуда умуман мулоқот қилмаганман, қандай қилиб уларга шахсий адоватим бўлиши мумкин, — дейди Зафар Суннатов. — Хўп, шахсий адоватим бўлган тақдирда ҳам 42 нафар талабанинг барчасига бўлмас.
«Нефть-газ конлари геологияси, қидирув ва разведкаси» факультети декани Улуғбек Панжиевнинг маълумот беришича, факультетдаги 42 нафар талабанинг курсдан қолдирилиши Вазирлар Маҳкамасининг 2017 йил 20- июндаги «Олий таълим муассасалари талабалари ўқишини кўчириш, қайта тиклаш ва ўқишдан четлаштириш тартиби тўғрисида»ги Низом талабларидан келиб чиққан ҳолда амалга оширилган.
Институт масъулларининг айтишича, курсдан қолдирилган 105 нафар талабага 3 марта имкон берилган.
— Биринчи имконият — улар 74 соатдан кўп дарс қолдиришса-да, талабалар сафидан чиқаришга шошилмадик, — дейди Улуғбек Панжиев. — 100-130 соатлаб дарс қолдирганларига «ақли кирар» деб жим турдик. Иккинчи имконият сифатида сентябр ойининг охирига қадар қарздорлиги мавжуд фанларидан қайта топширишга рухсат бердик. Бу ҳам етмаганидек, ректоримиз раҳбарлигида яна қайта имтиҳон олдик. Имтиҳонга кирган 8 нафар талаба «саволга тушунмадик, жавоб беролмаймиз» деб ёзиб чиқиб кетишди. Талаба ҳатто саволни тушунишга ҳам ожизлик қилди.
Маълум қилинишича, курсдан қолдирилган талабалар дастлаб институтда таҳсил олувчи блогер Капитан Каримовга (Умид Каримов) мурожаат қилган ва ҳуқуқларини ҳимоя қилишини сўраган. Блогер аралашуви боис ректор қайта имтиҳон топшириш хоҳишини билдирган 8 нафар талабадан ўзи бошчилигида имтиҳон олади.
— Саволлар ўта мураккаб экан, — дейди курсдан қолдирилган талабалар «Дарё» мухбири билан суҳбат давомида. — Тўғри, ўтилган мавзулардан тушди саволлар. Аммо жуда қийин тузилган экан-да. Бу саволларга ўқитувчиларимиз ҳам қийналиб жавоб берарди.
Зафар Суннатовнинг қўшимча қилишича, институт талабалари умуман ўқимай қўйган.
— Институтни тамомлаган талабаларимиз ишга жойлашиш учун корхона ва ташкилотларга, заводларга суҳбатга борганда оддий саволга ҳам жавоб беролмайди. Ўша пайт уялиб кетамиз, — дейди Зафар Суннатов. — Билими йўқ, уқувсиз талабани савлати учун ўқитиш ярамайди. Ўқишни истамайдими, ундай талабаларга сабоқ бериш учун курсдан қолдириш керак. Токи ўша курсни ўзлаштирмагунча.
Зафар Суннатовнинг маълум қилишича, 2018 йили вилоятдаги нуфузли заводлардан бирига ишга кириш иштиёқида борган 200 нафар талабанинг атиги 2 нафари суҳбатдан ўтолган ва ишга жойлашган.Курсдан қолдирилган собиқ талабалар билан ўқиган курсдошларининг фикрича, ушбу вазиятда институт раҳбарияти ҳақ.
— Талабадан фақат ва фақат ўқиш талаб этилади, — дейди Кибриё Менглиева. — Курсдан қолдирилган курсдошларимиз орасида яхши ўқишга ҳаракат қиладиганлари ҳам бор эди. Аммо қонун ва белгиланган тартиб барча учун бирдек. Институт раҳбарияти ҳам талабни бажараяпти.
Факультет ўқитувчиларининг айтишича, факультетда курсдан қолдирилган 42 нафар талабанинг айбини афв этишни сўраб, ҳокимлигу, вилоят прокуратурасидан қўнғироқлар бўлган.
Тасодифни қарангки, ушбу воқеадан сўнг факультетда вилоят прокуратураси талаби билан мутахассислар жалб қилиниб, текширув бошланган. Вилоят прокуратурасидагилар бу текширувнинг воқеага алоқаси йўқлигини айтмоқда.
— Мазкур текширувнинг ушбу воқеага боғлиқ жойи йўқ, — дейди вилоят прокуратураси ахборот хизмати. — Бу йиллик режамизга киритилган бўлиб, вақти шу воқеага тўғри келиб қолган, холос.Курсдан қолдирилган талабалар «Дарё» мухбири ҳамда факультет масъуллари билан суҳбати давомида айбларини тан олиб, масъуллардан ёрдам беришларини сўради.
— Бизга имкон беришсин, хатомизни англадик, — дейди собиқ талабалар. - Тўғри, тартиб, Низом бизни курсдан қолдиришни тақозо этар экан. Буни тушундик. Бироқ, бизнинг ижтимоий аҳволимизни ҳам ҳисобга олишсин. Грант асосида ўқиётганлар контрактга тушиб қолиши ёмон-да.
Институт ахборот хизматига кўра, курсдан қолдирилган 105 нафар талаба институтдаги мавжуд 6 та факультетнинг 5 тасида таҳсил олади. Иқтисодиёт факультетида курсдан қолдирилган талабалар йўқ.
Курсдан қолдирилган талабалар тақдирини ўрганар чоғи, собиқ талабалар муаллифлигида очилган Telegram каналини кузатиб, талабаларнинг кимгадир аччиқ қилаётгани, зардасини сезгандек бўлдик. Ҳаққини талаб қилиб чиқиш яхши, аммо ўз ҳаётидаги хатоликлар сабаб таълим берган устозлар шаънига ярашмайдиган сўз ёзиш, ўзгаларга аччиқ қилиб, террористик гуруҳларга қўшилиб кетишни шаъма қилиш қанчалик тўғри?
Изоҳ (0)