Ўзбекистонда Соғлиқни сақлаш вазирлигининг рухсатини олмасдан туриб, давлат тиббиёт муассасалари ҳудудида ноқонуний қурилиш ишларини олиб бориш ҳолатлари аниқланди, деб хабар бермоқда вазирлик матбуот хизмати.
Хусусан, Самарқанд вилояти Булунғур тумани тиббиёт бирлашмасига қарашли «Навбаҳор» қишлоқ врачлик пункти ҳудудининг 0,10 ер майдонида ҳаммом ва савдо мажмуасини қуриш учун фуқаро З.Алибоевга ер ажратиш бўйича ССВнинг розилигисиз 2018 йилда Булунғур туман ҳокимининг қарори қабул қилинган.
Ушбу ҳолат юзасидан Соғлиқни сақлаш вазирлиги томонидан Бош прокуратурага Булунғур тумани ҳокимининг қарори устидан протест келтирилиб, Булунғур тумани ҳокимининг қарори бекор қилинган. Бунинг натижасида қурилиши бошланган биноларни бузиш ишлари амалга оширилмоқда.
Шунингдек, 2017 йилда Сурхондарё вилояти тери-таносил касалликлари диспансери ҳудудидаги 300 квадрат метрдан иборат ер майдонини «Шифокор Валижон Сурхон» хусусий корхонасига ажратиш бўйича Термиз шаҳар ҳокимининг қарори қабул қилинган.
Ушбу ер майдонининг тадбиркорга берилиши ва маҳаллий ҳокимлик балансига олиниши бўйича Вазирлар Маҳкамасининг 2013 йил 25 февралдаги 54-сон қарори талабига зид равишда ССВнинг розилик хати олинмаган.
Мазкур ҳолат бўйича Сурхондарё вилояти тери-таносил касалликлари диспансери ер майдонини қайтариш мақсадида Термиз шаҳар ҳокимининг қарори устидан Бош прокуратурага протест келтирилиб, Термиз шаҳар ҳокимининг қарори бекор қилинган ҳамда ноқонуний қурилиши бошланган биноларни бузиш ишлари амалга оширилган.
Маълумот учун, Ўзбекистонда ҳар қандай давлат тиббиёт муассасаси ҳудудида тадбиркорлик фаолиятини ташкил қилиш амалдаги қонун ва қонуности ҳужжатларида белгиланган тартибда амалга оширилади.
Жумладан Президентнинг 2018 йил 7 декабрдаги «Ўзбекистон Республикаси Соғлиқни сақлаш вазирлиги фаолиятини ташкил этиш чора-тадбирлари тўғрисида»ги қарорининг 11-бандида ССВнинг розилигисиз давлат тиббиёт муассасаларининг ер участкалари ва кўчмас мулклари бегоналаштирилиши тақиқланганлиги белгиланган.
Изоҳ (0)