Сўнгги янгиликлар
    • USD 12216.01
    • RUB 123.1
    • EUR 12807.26
    Маҳаллий

    Бош прокуратура қўлга олинган Юнусобод ҳокими ўринбосарининг уйидан 1,5 млн доллар ва Мальдивга чипта топилгани ҳақидаги гап-сўзларни изоҳлади

    82926

    23 октябрь, чоршанба куни Юнусобод тумани ҳокимининг қурилиш ишлари бўйича ўринбосари ўзбошимчалик билан қурилган иморатга эгалик ҳуқуқини эътироф этиш бўйича туман ҳокимининг қарорини чиқариб бериш эвазига 5 000 АҚШ долларини пора тариқасида олган вақтда ашёвий далиллар билан ушланган эди.

    Кейинроқ айрим интернет нашрларда ҳоким ўринбосарининг уйини тинтув қилиш чоғида 1,5 миллион доллар нақд пул ва Мальдив оролларига иккита авиачипта топилгани ҳақида хабарлар тарқалди. Ўзбекистон Бош прокуратураси «Дарё»га ушбу ҳолат юзасидан маълумотларни тақдим этди.

    Қайд этилишича, Бош прокуратура томонидан Юнусобод туман ҳокимининг қурилиш масалалари бўйича ўринбосари Эркин Зоҳидовга нисбатан қўзғатилган жиноят иши юзасидан тергов ҳаракатлари олиб борилмоқда.

    Иш ҳужжатларига кўра, Эркин Зоҳидов 10 октябрь куни соат 21:00 ларда ўз хизмат хонасида фуқаро Р.Маматқуловдан пора тариқасида 5 минг АҚШ доллари миқдорида пул маблағларини олган вақтида жиноят устида ушланган.

    Шу билан бирга, Эркин Зоҳидовнинг хизмат хонаси кўздан кечириш жараёнида унинг иш столи тортмасидан 5 минг АҚШ доллари ҳамда ўзининг номига «Тошкент—Истанбул» йўналиши бўйича авиачипта «брон» қилинганлигини тасдиқловчи ҳужжат аниқланиб, баённома асосида олинган.

    Мазкур ҳолат юзасидан Департамент томонидан 11 октябрь куни Эркин Зоҳидовга нисбатан ЖКнинг 210-моддаси 2-қисми «в» банди билан жиноят иши қўзғатилиб, тергов ҳаракатларини давом эттириш учун Бош прокуратурага юборилган.

    Мавзуга доир: Юнусобод тумани ҳокимининг қурилиш ишлари бўйича ўринбосари 5 минг доллар пора билан қўлга тушди

    12 октябрь куни Эркин Зоҳидов ЖКнинг 210-моддаси 2-қисми «в» бандида кўрсатилган жиноятни содир этганликда гумон қилиниб, ушланган.

    Э.Зоҳидовнинг уйидан 1,5 миллион АҚШ доллари ва Мальдив оролларига авиачипта топилмаган, дейилади хабарда.

    Ҳозирда тергов ҳаракатлари давом эттирилмоқда.

    Маълумот учун, 2018 йилнинг сентябрь ойида Юнусобод туманининг ўша пайтдаги ҳокими Бахтиёр Абдусаматов пора олиш вақтида қўлга туширилди, у ер участкаларини ажратиш бўйича пора олганликда айбланди. Жиноят ишлари бўйича Тошкент шаҳар судининг 13 майдаги ҳукмига кўра, Бахтиёр Абдусаматовга 5 йилга озодликдан маҳрум қилиш жазоси тайинланди.