Туркманистоннинг 3 та вилоятида Гепатит А вируси тарқалгани хабар қилинди
Туркманистоннинг Тошҳовуз, Лебоб ва Ахалск вилоятларида Гепатит А касаллиги билан хасталанган беморлар шифохоналарга мурожаат қилмоқда.
Тошҳовуз шифокорлари вилоятда Гепатит билан беморларнинг оғриш ҳолатлари бундан уч йил аввал кузатилганини билдирмоқда. Уларнинг сўзларига кўра, касаллик бу йил ўз типиклигини йўқотган: аввал грипп аломатлари, сўнгра бемор териси рангининг сарғайиши ҳолатлари ва иситма кўтарилиши кузатилмоқда. Хасталанганларнинг асосий қисми болалар ва ўсмирлар.
«Фожиага олиб борувчи ҳолатлар ҳам кузатилиши мумкин. Шифохоналарда дорилар етишмайди. Оғир ҳолатларда шифокорлар «Гептрал»ни тавсия қилмоқда, аммо уни болалар тиббиётида қўллаш 18 йилга чеклаб қўйилган. Дорининг бешта ампуласи 600 манат туради. Эпидемия ҳақида гапириш тақиқлаб қўйилган», — дейди туркманистонликлардан бири. Бошқа бир фуқаро мактабгача таълим муассасалари ва мактаблар санитария воситалари етишмаслиги туфайли дезинфекция қилинмаганлигини, касаллик тарқалган муассасаларда ҳам ушбу иш амалга оширилмаганлигини билдирган.
Ахал вилоятида касаллик Тежен, Кака, ва Оқбуғдой туманларида тарқалган. Ушбу туманлардаги шифохоналарда Гепатит А билан оғриган болаларга жой қолмаган. Марий вилоятида касаллик сабаб айрим боғча ва мактабларда карантин эълон қилинган. Айрим ота-оналар иш жойидан касаллик варақаси очтирмаслик учун хаста фарзандларини ҳам мактаб ва боғчаларга юбормоқда. Баъзилар эса фарзандини мустақил равишда «Иммуноглобулин» бериб даволашга уринмоқда.
16 октябрда «Туркменистан Сегодня» ахборот агентлиги сайтида Соғлиқни сақлаш ва тиббиёт саноати вазирлигининг Давлат санитария эпидемиология марказининг хабари эълон қилинган. Хабарда 2019 йилда Туркманистонда 11 та эмлаш хизматларига яна учта пневмококк, ротавирус инфекциялари ҳамда Гепатит А касаллигига қарши вакциналаш амалга оширилаётганлиги қайд этилган.
Агентлик хабарида Туркманистоннинг охирги йилларда болалар ўртасида хавфли юқумли касалликларга қарши курашишда 95-99 фоиз эмлаш ишлар амалга оширилганлиги баён этилган.
