«Ўздонмаҳсулот» компанияси фаолияти билан яқиндан танишиш натижасида ушбу ташкилотнинг фермер хўжаликларидан қарзи борлиги ва уни тўлашга имкони йўқлиги аниқланди, деб ёзмоқда «Togri.uz».
Давлат харидлари бўйича ғаллага паст нарх белгилангани, унинг арзон баҳода сотилиши фермер хўжаликлари ва дон корхоналарига иқтисодий зарар келтираётгани туфайли фермерлар ҳукуматдан ғаллани эркин нархларда сотиш тизимини йўлга қўйишни сўраган эди. Шу масала юзасидан нашр томонидан «Ўздонмаҳсулот» компаниясига қарашли «Тошкентдонмаҳсулотлари» АЖ фаолияти ўрганилди.
«Тошкентдонмаҳсулотлари» корхонаси бош ҳисобчисининг маълум қилишича, ҳозирги кунда корхонанинг фермер хўжаликларидан 32,6 миллиард сўм қарзи бор ва бунинг асосий сабаби ғалла ва унга давлат томонидан аниқ нарх белгилаб қўйилганидир.
«Биз фермерларга ғалла учун шартномада кўрсатилган 1200 сўм нарх бўйича ҳақ тўлай олдик, холос. Қўшимча устама ва режадан ортиқ бажарилган ғаллага тўлай олмадик», — дейди бош ҳисобчи.
Дон корхоналари фермерлардан ғаллани давлат белгилаган нархда — 1430 сўмдан сотиб олиб, унни 1400 сўмдан сотмоқда. Натижада корхоналар иқтисодий зарар кўрмоқда.
«Бизда уннинг нархи давлат томонидан белгилаб қўйилган ва биз ана шу нарх бўйича ишлаймиз. Ҳозирги кунда уннинг 1 килограмми 1400 сўм. Энди ўйлаб кўринг, ғаллани 1430 сўмдан сотиб оламиз. Боз устига, бошқа харажатларимиз ҳам бор. ҚҚС билан ҳисоблаганда маҳсулотни 2400 сўмдан сотишимиз керак, бу нархдан кам эмас. Акс ҳолда, биз зарарига ишлаган бўламиз», — дейди корхона бош ҳисобчиси.
Ўзбекистон фермер, деҳқон хўжаликлари ва томорқа ер эгалари кенгаши бўлим бошлиғининг айтишича, ғалла етиштирувчи фермерларнинг харажатлари сони ва нархи йилдан йилга ошиб бораётганлиги, қолаверса, ғаллага аниқ нарх белгилаб қўйилгани хўжаликларнинг фойда кўра олмаётганига сабаб бўлмоқда.
«Фермерларнинг мурожаатлари инобатга олиниб, ғалла нархи эркинлаштирилган тақдирда бу ҳолат бозордаги ун ва ун маҳсулотларининг нархига таъсир кўрсатмайдими?» деган саволга кенгаш бўлим бошлиғи жавоб берган. Унинг айтишича, бозорда қайси маҳсулот танқис бўлса, унинг нархи ҳам кўтарилади. Эркин нархда маҳсулот кўпайтирилса, бу ўз навбатида нархнинг пасайишига олиб келади. Шунинг учун ноннинг нархи кўтарилиб кетишидан қўрқмаслик керак.
Изоҳ (0)