Тошкентда «тонировка»ни воситачи орқали ҳал қилмоқчи бўлган шахс 22 млн сўмдан айрилди
Тошкент шаҳар Мирзо Улуғбек тумани прокуратурасига 2 октябрь куни 34 ёшли Абдурасул Н.дан мурожаат келиб тушган.
Унда айтилишича, 2019 йилнинг май ойида 46 ёшли Шавкат Р. унинг ишончига кириб, Тошкент вилояти ИИББ ЙҲХБда танишлари борлигини билдириб, автомобиль учун тонировкага рухсат ва «чиройли» давлат рақами олиб беришини ваъда қилган.
Бунинг учун Шавкат Р. Абдурасул Н.дан 22 миллион сўм олган, аммо ўз ваъдасида турмасдан, пулларни эҳтиёжига сарфлаб юборган.
Ушбу факт бўйича Жиноят кодексининг 168-моддаси («Фирибгарлик») бўйича жиноий иш қўзғатилган.
«Ишонувчанлигингиздан фойдаланмоқчи бўлган нотаниш одамлардан эҳтиёт бўлинг. Автомобиль ойналарининг тусини ўзгартириш учун рухсатномани ва давлат рақамини харид қилиш учун тегишли идораларга расман мурожаат қилинг», — дейилади Тошкент шаҳар ИИББ матбуот хизмати хабарида.
Мавзуга доир:
4 сентябрдан банкларда «тонировка» учун рухсатнома бериш тўхтатилади
Ўзбекистонда нотўғри «тонировка»ланган машиналар жарима майдончасига тушиши мумкин