Наманган вилоятининг Чуст туманида туғилган Элёр Мўминов 2018 йил март ойида Фотима Эшонова билан шаръий никоҳдан ўтиб, турмуш қуради. Унинг ўзи бекорчи бўлса ҳам, турмуш ўртоғининг ишлашига қаршилик қилиб келган. Бу ҳақда «Дарё»га Жиноят ишлари бўйича Наманган вилояти суди судьяси Дилфуза Аҳмадалиева маълум қилди.
Фотима Эшонова Чуст туманидаги қаҳвахоналардан бирида официант бўлиб ишлаган. 2019 йил март ойида, соат 22:00 атрофида Э.Мўминов турмуш ўртоғи ишлаётган қаҳвахонага боради. У ерда хотини эркак мижозларга хизмат қилаётганини кўриб, жаҳли чиқади ва уни ёнига чақириб, бу ерда ишламаслигини талаб қилади. Қаҳвахона бошлиғидан эса турмуш ўртоғининг ойлик иш ҳақини беришини сўрайди. Бу вақтда Э.Мўминов ширакайф ҳолатда эди. Шундан сўнг эр-хотин такси чақириб, уйларига кетади. Кетишда ҳам у спиртли ичимлик олиб, йўлда ичиб кетади.
Уйдаги ўзаро тортишув жанжалга айланади. Турмуш ўртоғининг гапларидан ғазабланган Э.Мўминов ётоқхона деразаси токчасида турган пичоқни олиб, турмуш ўртоғига икки марта уради. Бундан қўрқиб кетган Фотима Эшонова ёрдам сўраб бақирганча ҳовлига қочиб чиқади. Унинг ортидан эри қувиб келади ва йиқилиб тушганидан фойдаланиб, сочидан ушлаб, бўйнига пичоқ тортади. Сўнг пичоқни ариққа отиб юбориб, ўзи уйдан қочиб кетади. Фотима Эшонова воқеа жойида ҳаётдан кўз юмди. Қотил эса шу куннинг ўзида ички ишлар ходимлари томонидан қўлга олинди.
Жиноят ишлари бўйича Наманган вилояти суди очиқ суд мажлисида судланувчи Э.Мўминов ўз айбига иқрорлик билдирди.
Суд жараёнида Э.Мўминов ўта хавфли рецидивист деб топилди. Чунки у аввал ҳам 4 марта судланиб, қамалиб чиққан, жазони 2018 йил сентябрь ойида тўлиқ ўтаб бўлган эди.
ЖИБ Наманган вилояти суди Э.Мўминов Жиноят Кодексининг 97-моддаси 2-қисми «ж» бандида назарда тутилган жиноятни содир этганликда айбли деб топилди. Унга 17 йил муддатга озодликдан маҳрум қилиш жазоси тайинланди ва жазони махсус тартибли колонияда ўташи белгиланди.
Изоҳ (0)