Ургут «Сувоқова» филиали мансабдорлари 256 миллион сўм пулни талон-торож қилди

Мажбурий ижро бюроси Самарқанд вилоят бошқармаси ва Ургут туман бўлими «Сувоқова» ДУК Ургут филиалидаги ноқонунийликларни аниқлади, деб «Дарё»га маълум қилади бюро матбуот хизмати.

Маълум қилинишича, Ургут тумани, «Ватак», «Мерганча», «Алгар», «Қуйи Тегана» ва «Дўстлик» маҳаллаларида жойлашган сув артезанларидаги сув иншоотларига ўрнатилган электр ҳисоблагичлар носоз ҳолга келган.

Шунингдек, электр ҳисоблагичлар электр таъминоти корхонаси электрон базасига киритилмагани оқибатида, 174 миллион 483 минг сўм зарар етказган.

«Сувоқова» ДУК туман филиали апрель ойи учун 32 миллион 345 минг сўмлик, май ойи учун 32 миллион 260 минг сўмлик, июнь ойи учун 30 миллион 359 минг сўмлик, июль ойи учун 57 миллион 819 минг сўмлик электр энергия истеъмоли тўғрисида маълумот берилган.

Аслида эса «Сувоқова» ДУК филиал мансабдор шахслари томонидан 2019 йил давомида туман электр таъминоти корхонасига тақдим этилган ҳисоботларда жами 256 миллион 158 минг сўм миқидордаги электр энергияси истеъмоли яширилиб, нотўғри ҳисобот тақдим қилингани аниқланган.

Мазкур ҳолат юзасидан бюро Ургут туман бўлими томонидан Ўзбекистон Республикаси Жиноят кодексининг 207-моддаси 1-қисми ва 209-моддаси 1-қисми билан жиноят иши қўзғатилган.