Уйида фоҳишахона ташкил этган шахсга нисбатан Навоий шаҳар судининг очиқ сайёр суд мажлисида жиноят иши кўриб чиқилди. Бу ҳақда Олий суд Ахборот хизмати хабар берди.
Хабарга кўра, вақтинча ишсиз бўлган Самад Зафаров (исм-шарифлар ўзгартирилган) ғаразли ва паст ниятда фоҳишахона ташкил этган.
У 2019 йил 2 августда ўзи ижарада яшаб келаётган Навоий шаҳридаги хонадонларнинг бирида 100 минг сўм пул эвазига Ш.А. ҳамда К.С.га интим алоқа қилишлари учун уйидан алоҳида хона ажратиб, уларга шарт-шароит яратиб берган вақтида Навоий шаҳар Ички ишлар органлари фаолиятини мувофиқлаштириш бошқармаси ходимлари томонидан ўтказилган тадбирда қўлга тушган. 100 минг сўм миқдоридаги пуллар холислар иштирокида ашёвий далил сифатида олинган.
Судланувчи С. Зуфаров суд мажлисида айбига иқрорлик билдирмаган, Ш.А. ва К.С. танишлари экани, улар билан бирга шунчаки ўтириб спиртли ичимлик истеъмол қилганини важ қилиб, ёши ҳамда оилавий шароитини инобатга олиб, суддан енгиллик сўраган.
Суд мажлисида унинг айби текширилган ва тўпланган далиллар йиғиндиси билан тўлиқ исботланди. С. Зафаров аввал ҳам шунга ўхшаш жиноят содир этгани ва бошқа барча ҳолатларни инобатга олиб судланувчига Ўзбекистон Республикасининг Жиноят кодекси 131-моддаси 2-қисмида назарда тутилган жиноятни содир этгани учун 1 йилу 6 ой озодликни чеклаш жазоси тайинланди.
Изоҳ (0)