Фарғона вилояти ҳокимининг тунги селектор йиғилишига кетаётган икки мактаб директори ўринбосари 29 сентябрь куни ҳалокатга учрагани ҳақида хабарлар тарқалди. Унда Данғара тумани халқ таълими бўлими тасарруфидаги 25 ва 26-мактабларнинг директор ўринбосарлари ва яна таълим муассасаларида ишловчи икки ходим бўлгани айтилган.
ИИВ ушбу хабарлар юзасидан Фарғона вилоят Ички ишлар бошқармасининг хабарига таянган ҳолда изоҳ берди. Унда ЙТҲда ҳалок бўлган ходимлар ҳақида маълумот берилиб, улар ўз шахсий юмушлари билан Данғара туманидан Қўқон шаҳри томон кетаётганда ҳалокатга учрагани айтилган.
Фарғона вилояти ҳокимлиги эса мактаб директорлари ўринбосарлари ҳеч қандай селекторда қатнашмаганини билдирган.
Ҳалокатга учраганларнинг бугунги аҳволи билан танишиш, мактаб ходимлари аслида ўша куни қаерга кетаётган бўлганига аниқлик киритиш мақсадида «Kun.uz» суриштирув ўтказди.
Қайд этилишича, 25-мактаб директор ўринбосарининг жияни Зоҳиджон Бердиқулов ҳодисадан кейин ўша жойга етиб бориб, бор воқеага гувоҳ бўлган ва 25-мактаб директори ўринбосари бўлган амакиваччасини «морг»га олиб борган.
«Ўша куни 25–мактаб директор ўринбосари бўлган қариндошимнинг укаси билан ўтиришда эдик. Укаси унинг машинасини миниб келган экан. Телефонда, ‘Ишхонадан Фарғона шаҳрига жўнатишяпти. Nexia’ни олиб кетаман. Якшанба куни ҳам тинчлик йўқ’, деб келиб, машина рулига ўтириб миниб кетди. Орадан бироз вақт ўтиб ёмон хабар келди. Етиб бордик. Қариндошимни ёниб кетган машинанинг рул томонидан ўзим чиқариб олдим. Белдан пасти қисилиб қолиб, ёнаётган машинадан чиқиб кета олмай, оламдан ўтган экан. Нариги олд ўриндиқдаги одам 26-мактаб директор ўринбосари зарба кучидан орқа томонга ўтиб, куйиб кетганини кўрдим. 1,5 соатда зўрға чиқариб олишди. Орқа ўриндиқда ўтириб, энг кам жароҳат олган киши ХТБ қоровули экан. Яна биттаси эса анча куйган ҳозир реанимацияда ётибди», — деган у.
Шунингдек, ҳалокат қандай содир бўлгани уни ҳали ҳам ўйлантираётгани, машинани текис йўлда кетаётиб, кўча ўртасидаги бетонга чиқиб кетганига ҳайронлигини айтган.
Машинанинг орқа ўриндиғида бўлиб турли тан жароҳатлари олган 38-мактаб хўжалик ишлари бўйича директор ўринбосари Т.Л. воқеа бўйича қуйидагиларни айтган:
«29 сентябрь куни туман халқ таълими бошқармасидан 30 сентябрь куни Фарғона шаҳрида ўтадиган ‘Ўқитувчилар байрами’га Данғара туман кўргазмасини олиб бориб, ўрнатиш кераклигини айтишди. Биз йўлга чиқиб, йўлда аварияга учрадик».
«Ўша куни кечқурун ишга чақиришди. Иш вақти бўлмаса ҳам чақиришгани учун ‘борманг’ дедик. Қайта-қайта чақиришгач чиқиб кетди. Кимдир буйруқ берди, ўғлим азоб тортяпти», — деган унинг онаси Умидахон Йўлчибоева.
Данғара туман халқ таълими бўлими бошлиғи Алимардон Содиқов директор ўринбосарлари ва ХТБ қоровули 29 сентябрь куни кечқурун 30 сентябрь куни Фарғона шаҳрида бўлиб ўтадиган тадбирга кўргазмали қуролларни олиб кетаётиб ҳалокатга учрагани ҳақиқат эканлигини тасдиқлаган.
«Ижтимоий тармоқларда тарқалган хабарларда мактаб раҳбарлари тунги селекторга кетаётгани ҳақида айтилибди. Мактаб директор ўринбосарлари, хўжалик бўйича масъул ва қоровул селекторларга чақирилмайди. Улар байрамга тайёргарлик учун кетишаётган эди», — дея изоҳ берган мутасадди.
Изоҳ (0)