Farg‘ona viloyati hokimining tungi selektor yig‘ilishiga ketayotgan ikki maktab direktori o‘rinbosari 29-sentabr kuni halokatga uchragani haqida xabarlar tarqaldi. Unda Dang‘ara tumani xalq ta’limi bo‘limi tasarrufidagi 25 va 26-maktablarning direktor o‘rinbosarlari va yana ta’lim muassasalarida ishlovchi ikki xodim bo‘lgani aytilgan.
IIV ushbu xabarlar yuzasidan Farg‘ona viloyat Ichki ishlar boshqarmasining xabariga tayangan holda izoh berdi. Unda YTHda halok bo‘lgan xodimlar haqida ma’lumot berilib, ular o‘z shaxsiy yumushlari bilan Dang‘ara tumanidan Qo‘qon shahri tomon ketayotganda halokatga uchragani aytilgan.
Farg‘ona viloyati hokimligi esa maktab direktorlari o‘rinbosarlari hech qanday selektorda qatnashmaganini bildirgan.
Halokatga uchraganlarning bugungi ahvoli bilan tanishish, maktab xodimlari aslida o‘sha kuni qayerga ketayotgan bo‘lganiga aniqlik kiritish maqsadida “Kun.uz” surishtiruv o‘tkazdi.
Qayd etilishicha, 25-maktab direktor o‘rinbosarining jiyani Zohidjon Berdiqulov hodisadan keyin o‘sha joyga yetib borib, bor voqeaga guvoh bo‘lgan va 25-maktab direktori o‘rinbosari bo‘lgan amakivachchasini “morg”ga olib borgan.
“O‘sha kuni 25–maktab direktor o‘rinbosari bo‘lgan qarindoshimning ukasi bilan o‘tirishda edik. Ukasi uning mashinasini minib kelgan ekan. Telefonda, ‘Ishxonadan Farg‘ona shahriga jo‘natishyapti. Nexia’ni olib ketaman. Yakshanba kuni ham tinchlik yo‘q’, deb kelib, mashina ruliga o‘tirib minib ketdi. Oradan biroz vaqt o‘tib yomon xabar keldi. Yetib bordik. Qarindoshimni yonib ketgan mashinaning rul tomonidan o‘zim chiqarib oldim. Beldan pasti qisilib qolib, yonayotgan mashinadan chiqib keta olmay, olamdan o‘tgan ekan. Narigi old o‘rindiqdagi odam 26-maktab direktor o‘rinbosari zarba kuchidan orqa tomonga o‘tib, kuyib ketganini ko‘rdim. 1,5 soatda zo‘rg‘a chiqarib olishdi. Orqa o‘rindiqda o‘tirib, eng kam jarohat olgan kishi XTB qorovuli ekan. Yana bittasi esa ancha kuygan hozir reanimatsiyada yotibdi”, — degan u.
Shuningdek, halokat qanday sodir bo‘lgani uni hali ham o‘ylantirayotgani, mashinani tekis yo‘lda ketayotib, ko‘cha o‘rtasidagi betonga chiqib ketganiga hayronligini aytgan.
Mashinaning orqa o‘rindig‘ida bo‘lib turli tan jarohatlari olgan 38-maktab xo‘jalik ishlari bo‘yicha direktor o‘rinbosari T.L. voqea bo‘yicha quyidagilarni aytgan:
“29-sentabr kuni tuman xalq ta’limi boshqarmasidan 30-sentabr kuni Farg‘ona shahrida o‘tadigan ‘O‘qituvchilar bayrami’ga Dang‘ara tuman ko‘rgazmasini olib borib, o‘rnatish kerakligini aytishdi. Biz yo‘lga chiqib, yo‘lda avariyaga uchradik”.
“O‘sha kuni kechqurun ishga chaqirishdi. Ish vaqti bo‘lmasa ham chaqirishgani uchun ‘bormang’ dedik. Qayta-qayta chaqirishgach chiqib ketdi. Kimdir buyruq berdi, o‘g‘lim azob tortyapti”, — degan uning onasi Umidaxon Yo‘lchiboyeva.
Dang‘ara tuman xalq ta’limi bo‘limi boshlig‘i Alimardon Sodiqov direktor o‘rinbosarlari va XTB qorovuli 29-sentabr kuni kechqurun 30-sentabr kuni Farg‘ona shahrida bo‘lib o‘tadigan tadbirga ko‘rgazmali qurollarni olib ketayotib halokatga uchragani haqiqat ekanligini tasdiqlagan.
“Ijtimoiy tarmoqlarda tarqalgan xabarlarda maktab rahbarlari tungi selektorga ketayotgani haqida aytilibdi. Maktab direktor o‘rinbosarlari, xo‘jalik bo‘yicha mas’ul va qorovul selektorlarga chaqirilmaydi. Ular bayramga tayyorgarlik uchun ketishayotgan edi”, — deya izoh bergan mutasaddi.
Izoh (0)