Афғонистон ижро ҳокимияти раҳбари ва мамлакат президентлигига номзод Абдулла Абдулла 30 сентябрь, душанба куни бўлиб ўтган матбуот анжуманида президентлик сайловининг иккинчи турини ўтказишга зарурат йўқ деб баёнот берди. Бу ҳақда «Afghanistan.ru» хабар қилмоқда.
28 сентябрда бўлиб ўтган овоз бериш натижалари ҳали расман эълон қилинмаган бўлса ҳам, номзод ўз жамоасининг ғалабасига ишонч билдирди.
Афғонистон мустақил сайлов комиссиясининг маълумотларига кўра, овоз беришда 2,1 миллион киши иштирок этган. Мутлақ ғалабага эришиш учун номзод 50 фоиздан кўпроқ овоз тўплаши керак, акс ҳолда сайловларнинг иккинчи тури ўтказилади.
Овозларни санаш билан бир вақтда, Афғонистонда сайлов ҳуқуқининг бузилиши ҳақида аризаларни рўйхатдан ўтказиш жараёни ҳам кетмоқда. Айни пайтда сайловларда суиистеъмол юзасидан шикоятлар бўйича комиссияга 2275 тадан ортиқ шикоят келиб тушган.
Абдулла Абдулла эҳтимолий ҳуқуқбузарликларни изоҳлар экан, овозларни сохталаштириш бўйича асосий хавф биометрик рўйхатдан ўтказиш тизимини ишлатишдан бош тортиш билан боғлиқлигини айтган. Афғонистоннинг шаффоф сайловлари жамғармасининг ҳисоб-китобига кўра, 24 фоиз сайлов участкаларининг ходимларига биометрик қурилмалар билан тўғри ишлаш ўргатилмаган, яна 109 та овоз бериш пунктида қурилмалар носоз бўлган.
Абдулла Абдулланинг қайд этишича, биометрик рўйхатдан ўтказиш тизимидан фойдаланиш овозларни оммавий равишда қалбакилаштиришнинг олдини олиш учун зарур. Унинг жамоаси мазкур қурилмалар ишлатилмаган ҳолда олинган овозларнинг ҳақиқийлигини тан олмайди.
Мавзуга доир: Афғонистонда бўлиб ўтган президентлик сайлови қонунийлиги шубҳаларга сабаб бўлиши мумкинлиги айтилди
Изоҳ (0)