Kvinnipeks universiteti prezident Donald Trampga qarshi impichment e’lon qilinishi yuzasidan aholi vakillari o‘rtasida so‘rov o‘tkazdi, deb yozadi The Hill ma’lumotiga tayanib “Kommersant”.
Fuqarolarning ko‘pchilik qismi ya’ni 57 foizi impichmentga qarshi, so‘rovda qatnashganlarning 37 foizi kongressdagilar fikriga qo‘shilmoqda.
So‘rov 19—23-sentabr kunlari 1,4 ming amerikaliklar o‘rtasida o‘tkazilgan. Avval shunga o‘xshash sotsiologik tadqiqotni Monmut universiteti vakillari o‘tkazgandi. Ushbu izlanishdan so‘ng ovoz beruvchilarning 59 foizi impichmentni yoqlamagan, 35 foizi esa unga rozilik bergan.
Ushbu so‘rovlarning ikkisi ham Trampning Ukraina prezidenti Vladimir Zelenskiy bilan telefondagi so‘zlashuvi stenogrammasi e’lon qilinguniga qadar o‘tkazilgan. Suhbat mazmunidan boxabar bo‘lgach demokratlar impichment boshlash tashabbusini ilgari surgandi. Telefondagi so‘zashuvda Donald Trampning 2020-yilda bo‘lib o‘tadigan prezidentlik saylovlarida asosiy raqibi bo‘lishi kutilayotgan Jo Baydenning o‘g‘li Xanter Baydenga nisbatan o‘tkazilayotgan tergov ishlari haqida gap borgan.
Demokratlarning fikricha, AQSh prezidenti Zelenskiyga bosim o‘tkazgan. So‘zlashuvlar mazmuni oshkor bo‘lgach AQSh Kongressining vakillari palatasi spikeri Nensi Pelosi impichment jarayonini boshlash zarurati paydo bo‘lganligini ma’lum qildi. O‘z navbatida AQSh Adliya vazirligi bunda amaldagi qonunchilik zid keluvchi holatlar kuzatilmaganini qayd etgan va keyingi surishtiruv ishlarini to‘xtatgan. Vladimir Zelenskiy ham AQSh tomonidan o‘ziga bosim o‘tkazilgan deb hisoblamayapti.
Izoh (0)