Европа Чемпионлар Лигасининг 1-туридан ўрин олган «Атлетико» ва «Ювентус» жамоалари иштирокидаги ўйин 18 сентябрь тунида бўлиб ўтади.
«Vanda Metropolitanо»даги баҳс кескин курашга бой бўлиши кутилмоқда. Ўтган мавсумда жамоалар буни исботлаб берганди. Мадридда 2:0 ҳисобдаги ғалабани қўлга киритган Диего Симеоне шогирдлари Туринда йирик мағлубиятни (0:3) қабул қилиб олганди.
«Атлетико» Еврокубокларда бунга қадар «Ювентус» билан икки бор ўз майдонида куч синашган ва иккисида ҳам зафар қучган. Февралдаги 2:0 дан ташқари, «матрасчилар» Чемпионлар Лигасининг 2014/15 йилги мавсуми гуруҳ босқичида туринликларни минимал ҳисобда таслим этганди. Бу жамолар ёзда Халқаро Чемпионлар Кубогида ҳам ўзаро баҳс юритди. Унда испанлар 2:1 ҳисобидаги ғалабани қўлга киритганди.
«Атлетико»
Ёзги трансфер мавсумида бир қатор ўзгаришларга қўл урган мадридликлар Ла Лигани кўтаринки руҳда бошлади. Кетма-кет учта турдаги ғалабадан кейин «матрасчилар»ни «Реал Сосьедад» тўхтатиб қолди. Симеоне жамоаси бу мавсум аввалгига қараганда «қувноқ»роқ кўринмоқда. Мутахассис янги футболчилардан фойдаланган ҳолда бир баҳснинг ўзида турли хил услублар қўллаган ҳолда рақибларини чалғитишга эришяпти. Бироқ бугунги рақиб анойилардан эмас...
«Атлетико» бугун Альваро Мората ва Томас Парти хизматларидан фойдалана олмайди. Испаниялик ҳужумчи жароҳатини тиклаган бўлсада, мураббийлар штаби уни қайдномага киритмади.«Ювентус»
«Кекса синьора» ҳам мавсумни яхши бошлади, дастлаб «Парма»ни минимал ҳисобда таслим этган жамоа кейинги турда асосий рақиби «Наполи»ни доғда қолдирди (4:3). Бироқ учинчи турда «Фиорентина» билан дуранг ўйнаган «Юве» турнир жадвалида учинчи поғонага тушиб кетди. Маурицио Сарри мазкур ўйинни ўз фойдасига ҳал этган ҳолда барча танқидларга муносиб жавоб қайтариши мумкин.
Туринликларда ҳам кадрлар муаммоси етарлича. «Ювентус» бугун жароҳат сабаб сафдан чиққан Дуглас Коста ва Маттиа де Шилё хизматидан фойдалана олмайди. Шунингдек, Эмре Жан ва Марио Манжукич қатори бир неча ойга сафдан чиққан Жоржио Кьеллини ҳам Чемпионлар Лигаси қайдномасига киритилмаган. Миралем Пьянич эса бугун майдонга тушиши кутилмоқда.Статистика ва қизиқарли фактлар
- «Атлетико» ва «Ювентус» Еврокубокларда жами тўрт бор тўқнаш келган: 2 ғалаба испанларда, битта туриинликларда ва 1 дуранг
- Мадриддаги ўйинларнинг ҳаммасида «Атлетико» ғалабага эришган, «Юве» эса бирорта ҳам гол ура олмаган
- Криштиану Роналду «Атлетико»га қарши саккизта Еврокубок ўйинида 7 та гол уришга эришган
- «Атлетико» италян клубларига қарши ўз майдонида 12та ўйин ўтказиб, уларнинг 9 тасида ғалаба қозонган ва учта ўйинда мағлуб бўлган. Сўнгги олтита уй ўйинида «матрасчилар» кетма-кет ғалабага эришмоқда, тўплар нисбати эса — 14:1
- «Атлетико» еврокубоклардаги сўнгги тўққизта уй ўйинини ғалаба билан якунлаган
- «Ювентус» Чемпионлар Лигасидаги сўнгги учта сафар ўйинида ғалабага эриша олгани йўқ (дуранг ва икки мағлубият)
Тахминий таркиблар
Нодирхон Ҳамидхонов тайёрлади
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)