Польша пойтахти Варшавада 16 сентябрь, душанба куни Европада Хавфсизлик ва ҳамкорлик ташкилотининг (ЕХҲТ) Инсон мезонлари соҳасидаги мажбуриятларни бажариш таҳлилига бағишланган 23-кенгаши ўз ишини бошлади.
Марказий сайлов комиссияси (МСК) матбуот хизматининг «Дарё»га маълум қилишича, икки ҳафта давом этадиган мазкур кенгаш йиғилишида Ўзбекистон делегацияси таркибида Олий Мажлис палаталари, МСК, Ташқи ишлар вазирлиги, Инсон ҳуқуқлари бўйича миллий марказ ва бошқа ташкилотлар вакиллари иштирок этмоқда.
ЕХҲТнинг инсон мезонлари бўйича кенгаши Европадаги инсон ҳуқуқлари соҳасидаги энг йирик анжуман бўлиб, йилига бир марта Варшавада ўтказилади. Мазкур мулоқот майдонида ЕХҲТга аъзо 57 давлатнинг расмий делегациялари, ҳамкор давлатлар, халқаро ташкилотлар ва уларнинг ихтисослаштирилган муассасалари, шунингдек, нодавлат ташкилотлари вакиллари иштирок этади.
Кенгаш давомида ўн саккизта амалий сессиядан ташқари, бошқа тадбирлар ҳам бўлиб ўтади.
ЕХҲТга аъзо давлатлар ҳукуматлари ва нодавлат секторлари вакиллари бағрикенглик ва камситмаслик, қонун устуворлиги, асосий эркинликлар, гуманитар ва бошқа масалаларни ўз ичига олган инсонийлик мезонлари соҳасида қабул қилинган мажбуриятларининг бажарилиши ва бу борада эришилган ютуқлар ҳақида ҳисобот беради. Ҳисоботлар муҳокама қилинади. Айни пайтда, кун тартибидан «Журналистлар хавфсизлиги» ва «Аламзадаликдан келиб чиқадиган жиноятлар» каби мавзулар ҳам жой олган.
Кенгашни Польшанинг Ташқи ишлар вазири, Словакия Ташқи ишлар вазири, ЕХҲТ Демократик институтлар ва инсон ҳуқуқлари бўйича Бюроси (ДИИҲБ) директори, ЕХҲТ Бош котиби, ЕХҲТ Парламент Ассамблеяси Президенти ва ЕХҲТ инцитутларининг раҳбарлари очиб берди.
Кенгашда Ўзбекистон делегацияси мамлакатни ривожлантиришнинг янги босқичига оид амалий чора-тадбирлар, мамлакатни модернизация қилиш, инсон ҳуқуқлари ва эркинликлари, қонун устуворлигини таъминлашнинг энг муҳим ва долзарб вазифаларни рўёбга чиқариш бўйича амалга оширилган ишлар юзасидан маърузаларини тақдим этади.
Изоҳ (0)