Varshavadagi YeXHTning Inson mezonlari bo‘yicha kengashida O‘zbekiston delegatsiyasi ishtirok etmoqda
Polsha poytaxti Varshavada 16-sentabr, dushanba kuni Yevropada Xavfsizlik va hamkorlik tashkilotining (YeXHT) Inson mezonlari sohasidagi majburiyatlarni bajarish tahliliga bag‘ishlangan 23-kengashi o‘z ishini boshladi.
Markaziy saylov komissiyasi (MSK) matbuot xizmatining “Daryo”ga ma’lum qilishicha, ikki hafta davom etadigan mazkur kengash yig‘ilishida O‘zbekiston delegatsiyasi tarkibida Oliy Majlis palatalari, MSK, Tashqi ishlar vazirligi, Inson huquqlari bo‘yicha milliy markaz va boshqa tashkilotlar vakillari ishtirok etmoqda.
YeXHTning inson mezonlari bo‘yicha kengashi Yevropadagi inson huquqlari sohasidagi eng yirik anjuman bo‘lib, yiliga bir marta Varshavada o‘tkaziladi. Mazkur muloqot maydonida YeXHTga a’zo 57 davlatning rasmiy delegatsiyalari, hamkor davlatlar, xalqaro tashkilotlar va ularning ixtisoslashtirilgan muassasalari, shuningdek, nodavlat tashkilotlari vakillari ishtirok etadi.
Kengash davomida o‘n sakkizta amaliy sessiyadan tashqari, boshqa tadbirlar ham bo‘lib o‘tadi.
YeXHTga a’zo davlatlar hukumatlari va nodavlat sektorlari vakillari bag‘rikenglik va kamsitmaslik, qonun ustuvorligi, asosiy erkinliklar, gumanitar va boshqa masalalarni o‘z ichiga olgan insoniylik mezonlari sohasida qabul qilingan majburiyatlarining bajarilishi va bu borada erishilgan yutuqlar haqida hisobot beradi. Hisobotlar muhokama qilinadi. Ayni paytda, kun tartibidan “Jurnalistlar xavfsizligi” va “Alamzadalikdan kelib chiqadigan jinoyatlar” kabi mavzular ham joy olgan.
Kengashni Polshaning Tashqi ishlar vaziri, Slovakiya Tashqi ishlar vaziri, YeXHT Demokratik institutlar va inson huquqlari bo‘yicha Byurosi (DIIHB) direktori, YeXHT Bosh kotibi, YeXHT Parlament Assambleyasi Prezidenti va YeXHT intsitutlarining rahbarlari ochib berdi.
Kengashda O‘zbekiston delegatsiyasi mamlakatni rivojlantirishning yangi bosqichiga oid amaliy chora-tadbirlar, mamlakatni modernizatsiya qilish, inson huquqlari va erkinliklari, qonun ustuvorligini ta’minlashning eng muhim va dolzarb vazifalarni ro‘yobga chiqarish bo‘yicha amalga oshirilgan ishlar yuzasidan ma’ruzalarini taqdim etadi.
