Голливудда актёрларнинг гонорари актрисаларга нисбатан ўртача 20 фоизга кўп экани маълум бўлди

Голливудда эркак актёрларнинг маоши аёл ҳамкасбларига нисбатан юқори бўлиб қолмоқда. Хаддерсфилд, Висконсин ва Ланкастер университетлари тадқиқотчилари шундай хулосага келди, дея хабар беради Meduza.

Тадқиқотчилар 1980 йилдан 2005 йилгача бўлган даврда 1343 фильмда суратга тушган актёрларнинг маошини ўрганди. Уларга кўра, вақт ўтиши билан маошлардаги фарқ деярли ўзгармаган.

Ўрганишлар фильмларда иштирок этаётган аёлларга эркакларга нисбатан 56 фоизга кам ҳақ тўланишини кўрсатди. Агар бунда актёрларнинг машҳурлиги ва мақоми, мукофотларга эгалиги, олдинги муваффақиятли лойиҳалари каби гонорарга таъсир қилувчи омиллар ҳисобга олинса, фарқ ўртача 20 фоизни ташкил этади.

Аёллар таниқлилик даражаси бир хил бўлган эркакларга нисбатан фильм учун 1,1 миллион доллар кам ҳақ олади.

Маълумот учун, Forbes рейтингида сўнгги йилларда энг кўп ҳақ тўланган актёр деб эътироф этилган Дуэйн Жонсон 89,4 миллион доллар ишлаб топган. Актрисалар ўртасидаги шундай рейтингни бошқарган Скарлетт Йоханссон эса 56 миллион доллар билан кифояланди. Бу юқори ҳақ тўланадиган актёрлар бешлигига кирган эркаклар топган даромаддан паст ҳисобланади.