Пойтахтда ҳар йили шаҳар аҳолисининг хавфсизлигини таъминлашга қаратилган «Хавфсиз ҳудуд» тадбирлари ўтказилмоқда. ИИББ матбуот хизматига кўра, ушбу тадбирлар давомида жамоат жойлари, жумладан, Сайилгоҳ кўчаси, боғлар ва хиёбонлар, кўнгилочар-савдо марказлари, бозорлар ва ҳоказоларга алоҳида эътибор қаратилади.
Баъзи объектларда вазиятни кузатиш учун ташқи кузатув интеллектуал камераларидан фойдаланилади. Маълумотлар базасига қидирувда бўлган шахсларнинг биометрик паспортларидаги маълумотлар, яъни тартиб бўйича кўзойнаксиз, бош кийимисиз ва соқолсиз туширилган расмлари киритилган.
23—24 август кунлари Шайхонтоҳур туманидаги «Малика» савдо масканида бўлиб ўтган ҳодисага тўхталадиган бўлса, у ерда ишлайдиган баъзи шахслар бўйича ўғрилик, ўғирланган қўл телефонларини сотиб олиш ва сотиш фактлари асосида қўзғатилган жиноят иши доирасида тезкор тадбирлар ўтказилган. Афсуски, бу каби ҳолатлар ҳануз рўй бериб туради ва ушбу савдо масканида расман ва норасман ишлайдиган алоҳида шахслар қонунбузарликларга аралашиб қолган. Суҳбатга таклиф этилганлар соқоли бор ёки йўқларга ажратилмаган, аммо таъкидлаш жоизки, соқоллилар у ерда кўпчиликни ташкил этади.
Алоҳида фуқароларга ташқи кўринишларини биометрик паспортларидаги расмларига мувофиқлаштириш тавсия этилган. Деярли барча ушбу илтимосни тўғри тушунди. Кўплар соқол қўйиб юриш улар учун муҳим эмаслиги, балки вақт йўқлиги, модага тақлид қилиш ва бошқа сабабларга кўра соқолларини олмаганларини маълум қилди.
«Қатъий маълум қиламизки, юқоридаги ҳолатга диний мазмуннинг ҳеч қандай алоқаси йўқ. Қолаверса, бу вазиятда диндорларнинг ҳиссиётлари билан ўйнашиш, мазкур мавзуни бўрттириш ноўрин.
Ҳурматли ҳамшаҳарлар ва пойтахт меҳмонлари! Жамоат тартибини сақлаш ва сизнинг хавфсизлигингизни таъминлаш осон иш эмас, аксинча, баъзида кўп қиррали, хатарли бўлиши мумкин. Кўплаб ҳолатлар нозик бўлиб, инсон ҳуқуқлари ва эркинлиги, унинг шахсий ҳаёти масалаларига бориб тақалиши мумкин. Шу сабабли ички ишлар ходимлари олдиларига қонун доирасида иш тутиш вазифалари қўйилади. Фуқароларда ҳам ҳуқуқлардан ташқари Конституция ва қонунларга амал қилиш, ўзгалар ҳуқуқи, эркинлиги, шаънини ҳурмат қилиш мажбурияти мавжуд», — дейилади хабарда.
Изоҳ (0)