Фотогалерея: Миллионерлар яшайдиган топ 10 мамлакат

Ер юзида бойлиги 50 миллион АҚШ долларидан ошган одамларнинг умумий сони 149 890 кишига етди.

Маълумотларга кўра, 50 230 нафар одамнинг бойлиги — $100 миллионни ташкил этса, 4 390 кишининг камида $500 миллион долларга тенг бойлиги бор.

Ушбу маълумотлар асосида Credit Suisse экспертлари энг кўп миллионерлар истиқомат қиладиган мамлакатлар рейтингини тузиб чиқди. Хўш, миллионерлар қайси давлатларда яшайди?

10. Австралия

Бадавлат фуқаролар сони: 2 910 киши

Австралия иқтисодиёти бўйича дунёда 13-ўринда, аҳоли жон бошига ЯИМ ҳажми бўйича олтинчи ўринда туради. Мамлакат турмуш даражаси, соғлиқ, таълим, молиявий эркинлик, фуқаролар эркинлиги ва сиёсий ҳуқуқларини ҳимоя қилиш каби кўплаб соҳаларда инсон потенсиалининг ривожланиш индекси бўйича эса иккинчи ўринда туради.

Бундан ташқари, Австралиядаги қулай иқлим мамлакат доимий яшаш жойи сифатида танланиши сабабларидан биридир.

9. Канада

Бадавлат фуқаролар сони: 3 010 киши

Канада дунёдаги аҳоли даромади юқори бўлган, Иқтисодий ҳамкорлик ва ривожланиш ташкилоти ҳамда G7 га аъзо давлатлардан бири ҳисобланади. мазкур давлат Америка Қўшма Штатларининг асосий савдо ҳамкори ҳисобланади.

Канада иммигрантлар мамлакати. Иммиграциянинг ўсишида мамлакатнинг юқори даражада ривожлангани, тинч, этник муаммолардан ва можаролардан ҳоли бўлгани асосий рол ўйнайди.

8. Франция

Бадавлат фуқаролар сони: 3 040 киши

Мамлакат иқтисодиётида фаол аҳолининг 76,7 фоизи хизмат кўрсатиш соҳасида фаолият олиб боради. Иккиламчи секторнинг улуши 20,5 фоизни ташкил қилади. Франциянинг иқтисодиёти унинг халқаро майдондаги ролини белгилаб берган. Франция улкан маданий меросга эга ва бу мерос турли даврларда ўзига хос аҳамиятга эга бўлган.

7. Италия

Бадавлат фуқаролар сони: 3 220 киши

Италия — қишлоқ хўжалиги ва саноати ривожланган мамлакат. Бой маданий мерос ҳамда қулай иқлим шароити бойлар Италияни танлашлари учун асосий сабаб бўлади.

6. Ҳиндистон

Бадавлат фуқаролар сони: 3 400 киши

Сўнгги 10 йил ичида Ҳиндистон ЯИМ 5,5 % га ўсди. Бу кўрсаткич эса мамлакат иқтисодиёти энг тез ўсаётган малакатлардан бири деб эътироф этилишига сабаб бўлди.

Ҳиндистонда инглиз тилида сўзлашадиган мутахассисларнинг борлиги сабаб кўплаб трансмиллий корпорациялар учун аутсорсинг маконига айланган. Шунингдек, мамлакат тиббиёт туризми бўйича ҳам жаҳонда анча танилган.

5. Япония

Бадавлат фуқаролар сони: 3 580 киши

Япония — ривожланган давлат. Аҳоли турмуш даражаси ҳам юқори. Шунингдек, мамлакат узоқ умр кўриш бўйича юқори, туғилишлар ўлими бўйича энг паст кўрсаткичларга эга мамлакат. Банк хизматлари, суғурта, транспорт, савдо-сотиқ, телекоммуникация ҳамда қурилиш соҳалари мамлакат иқтисодиётининг ривожланишида асосий аҳамиятга эга.

4. Буюк Британия

Бадавлат фуқаролар сони: 4 670 киши

Буюк Британиянинг хизмат кўрсатиш соҳаси мамлакат иқтисодиётининг асосий сектори ҳисобланиб, у ялпи ички маҳсулотининг 75% ни ташкил этади. Банк сектори яхши ривожланган. Британияда солиқ имтиёзлари мавжудлиги бадавлат кишилар учун бирмунча қулайликлар яратади.

3. Германия

Бадавлат фуқаролар сони: 6 320 киши

Германия — иқтисодиёти жадал ривожланаётган давлат. Мамлакат йирик маҳсулотларнинг экспорти ва импорти бўйича дунёда учинчи ўринда туради. Турмуш даражаси юқори. Ижтимоий ҳимоя, соғлиқни сақлаш тизими, атроф-муҳитни муҳофаза қилиш ва бепул олий таълим берадиган давлат ҳисобланади.

2. Хитой

Бадавлат фуқаролар сони: 16 510 киши

Хитой иқтисодиётида сўнгги 10 йилда тинимсиз ўсиш кузатилмоқда. У ўзининг таълим тизимини ривожлантириши билан бирга, технология ва бошқа маҳсулотлар импортида ҳам етакчи ҳисобланади. Дастурий таъминот, янги материаллар ишлаб чиқариш, телекоммуникация саноати, биотехнология, соғлиқни сақлаш соҳаларидаги ривожланишлар мамлакат тараққиётида асосий аҳамиятга эга.

1. АҚШ

Бадавлат фуқаролар сони: 70 540 киши

Қўшма Штатлар дунёда иқтисодиёти номинал ялпи ички маҳсулот бўйича биринчи, ялпи ички маҳсулоти бўйича иккинчи ўринда бўлган, юқори ривожланган мамлакат ҳисобланади. Мамлакат аҳолиси дунё аҳолисининг атиги 4,3 фоизини ташкил этишига қарамай, дунёдаги жами бойликнинг 40 фоизига айнан америкаликлар эгалик қилади. Америка бир қатор ижтимоий-иқтисодий кўрсаткичлар бўйича, хусусан, ўртача иш ҳақи, инсон тараққиёти индекси, ЯИМ ва меҳнат унумдорлиги бўйича дунёда етакчилик қилади.