Шотландияда садоқатли ит эгасининг ўлимидан 15 дақиқа ўтиб вафот этди

Шотландиянинг Аллоа шаҳрида садоқатли ит эгасининг ўлимидан 15 дақиқа ўтиб, вафот этди, деб ёзади Daily Mirror.

25 ёшли Стюарт Хатчисон саккиз йил мобайнида мия саратони билан курашган. У кимёвий терапия курсини ва бир нечта операцияларни бошидан ўтказган.

Йигит умрининг сўнгги кунида қайнотаси уларникига ташриф буюради ва куёвининг итларидан бири — Неро ўзини ёмон ҳис қилаётганини сезади. Жониворни ветеринария касалхонасига олиб борганида, шифокор жониворнинг умуртқа поғонаси шикастланганини аниқлайди, аммо итга ёрдам бера олмайди, у вафот этади. Кейинроқ маълум бўлишича, бундан 15 дақиқа аввал итнинг хўжайини — Стюарт Хатчисон ҳам ҳаётдан кўз юмган экан.