Ижтимоий тармоқларда Фарғона вилояти архив иши бошқармаси раҳбари қўл остидаги ходимларни уйида лой босишга мажбурланиши ҳақидаги хабар «Ўзархив» агентлиги томонидан ишчи гуруҳ тузилиб, жойига чиққан ҳолда ўрганиб чиқилди.
Ўрганиш жараёнида 2019 йил 16 июль куни соат 6:00 дан 8:40 лар оралиғида жами 12 нафар ходим ўз ихтиёри билан ҳашарда иштирок этганлиги аниқланди.
Ҳашарда иштирок этган ходимларнинг ҳар бири билан, шунингдек, давлат архивларининг бошқа ходимлари билан яккама-якка суҳбатлар ўтказилди.
Ходимлар ҳашар ўтказилаётганлигини эшитиб, ўз ихтиёри билан бошқарма бошлиғи Ю.Камоловнинг хонадонига ишдан ташқари вақтда борганлиги, уларни ҳеч ким мажбурламаганлиги, ишдан бўшатиш бўйича таҳдидлар қилинмаганлиги, улар томонидан бирор ташкилотга оғзаки ёки ёзма равишда шикоят қилинмаганлигини билдирган.
Шундай бўлса-да, Фарғона вилояти архив иши бошқармаси бошлиғи Ю.Камоловга нисбатан раҳбарлик этикаси ва одоб-ахлоқ қоидалари талабларига риоя этмаганлиги, ходимлар ўртасида соғлом муҳитни ярата олмаганлиги сабабли ҳайфсан эълон қилинди ҳамда лавозимга лойиқлик масаласини кўриб чиқиш белгиланди.
Агентлик мажбурий меҳнатнинг ҳар қандай турини қоралиши ҳамда унга доимо қарши туришини маълум қилинган.
Изоҳ (0)