Сирдарё вилоятида 22 август куни I халқаро инвестиция форуми бўлиб ўтади. Бу ҳақда вилоят ҳокимлиги матбуот хизмати «Дарё»га маълум қилди.
Хабарда айтилишича, форумда 200 дан ортиқ хорижий компания раҳбарлари иштирок этиши кутилмоқда. Форум вилоятнинг иқтисодий салоҳияти ва мавжуд имкониятлари тўғрисида хорижий ҳамкорларга маълумотлар бериш мақсадида ўтказилмоқда.
Форум иши ўз олдига вилоятда қишлоқ хўжалигида инновацион ёндашувларни ишга солиш, саноатда муқобил энергия манбаларидан фойдаланишни ривожлантариш каби устувор йўналишларни белгилаб олган. Шунингдек, туризм инфра-тузилмаларини ҳамда ахборот коммуникация технологияларини ривожлантириш масалаларини кўриб чиқиш кўзда тутилган.
Ҳозирда «Сирдарё» эркин иқтисодий зонасига киритиладиган инвестициялар ҳажмидан келиб чиққан ҳолда иштирокчилар учун 3 йилдан 10 йилгача бўлган муддатларга солиқ ва божхона имтиёзлари мавжуд. Ховос тумани ҳудудида ҳам кичик саноат зонаси ташкил қилинган бўлиб, ушбу зонадаги бўш турган давлат бино ва иншоотлари тадбиркорларга кейинчалик хусусийлаштириш шарти билан 5 йил муддатга ижарага берилади.
Форум доирасида «Гуллар фестивали», «Қушлар кўргазмаси» ва «Қовун сайли» ўтказилади.
Изоҳ (0)