Ижтимоий тармоқларда тарқалган 14 ёшли боланинг касалхонага тирик бориб, ўлик қайтгани иддао қилинаётган видеолавҳа тарқалган эди. Соғлиқни сақлаш вазирлиги ушбу видеолавҳани атрофлича ўрганди. Бу ҳақда вазирлик Жамоатчилик билан алоқалар бўлими «Дарё»га хабар берди.
Жорий йил 1 август куни соат тахминан 17:00 лар атрофида Республика шошилинч тиббий ёрдам илмий маркази Самарқанд филиали қабул бўлимига 14 ёшли А.И. йўл машинасида олиб келинган. Қариндошларининг айтишича, А.И. бозорда стулга ўтирган вақти бирданига ҳушидан кетган ва йиқилган.
Филиал қабул бўлимида А.И. кўрикдан ўтказилганда у биологик ўлим ҳолатидалиги аниқланган. Шунга қарамай шифокорлар юрак ташқи массажини амалга оширган, махсус қопча орқали нафас берилиб, стандартлар асосида тиббий муолажалар тезкорлик билан кўрсатилган.
А.И.нинг қариндошларига биологик ўлим мавжудлиги, қилинаётган реанимацион чора-тадбирлар самарасизлиги ҳақида бир неча бор айтилишига қарамасдан, улар қабул бўлими врачларини ҳақоратлаб, тазйиқ остида реанимацион чоралар кўрсатишни давом эттиришга мажбурлаган. Ижтимоий тармоқларда тарқалаётган видеолавҳа марҳум келтирилгандан кейин 30 дақиқа ўтиб олинган тасвирлар бўлиб, барча кўрсатилаётган ёрдам мурда қариндошлари тазйиқи ва босими остида бажарилган. Сўнгра мурда ички ишлар ходимларига топширилиб, суд-тиббий экспертиза бюросига ўтказилган.
«Иш вақтида ҳеч қайси тиббиёт ходими спиртли ичимлик истеъмол қилмаган. Ижтимоий тармоқлардаги ‘врачлар спиртли ичимлик ичган ҳолатда ёрдам кўрсатаяпти’ деган иддаолар ёлғон ва туҳмат бўлиб, агар врачлар ҳақиқатан ҳам ушбу ҳолатда спиртли ичимлик ичиб, ёрдам кўрсатаётган бўлганида марҳумнинг қариндошлари у ердаги шифокорларни ўша вақтдаёқ тинч қўйишмаган бўларди», — дейди филиал директори Акбар Тиляков.
«Соғлиқни сақлаш вазирлиги ҳуқуқни муҳофаза қилиш органларидан ушбу ҳолат юзасидан, яъни ижтимоий тармоқларда ёлғон видеолавҳа тарқатиб, халқда тиббиёт ходимларига нисбатан ишончсизлик уйғотишга ҳаракат қилаётган фуқароларга нисбатан қонунда белгиланган тартибда ҳуқуқий чоралар кўришларини сўрайди», — дейилади хабарда.
Изоҳ (0)