Қозоғистоннинг «Отар» базаси полигонида 13 август куни миномётчилар ҳисоби ўртасида ўтказилган «Артиллерия олови усталари» халқаро танловининг якуний натижаларига кўра, Ўзбекистон фахрли учинчи ўринни қўлга киритди.
Мудофаа вазирлиги Ахборот ва оммавий коммуникациялар департаменти хабарига кўра, биринчи ўринни Қозоғистон жамоаси олган бўлса, иккинчи ўрин Россияга насиб этган. Танловда Арманстон, Беларусь, Венесуэла, Озарбайжон, Зимбабве, Эрон, Қирғизистон, Қозоғистон, Россия, Сурия, Тожикистон ва Ўзбекистон жамоалари иштирок этган.
Ўзбекистонлик миномётчилар биринчи ва иккинчи босқичлардаги натижаларига кўра, Озарбайжон ва Беларусь жамоалари билан бир қаторда умумжамоа ҳисобида 3-ўринни қўлга киритган эди.
Сўнгги «Эстафета» босқичида эса Қозоғистон ва Россия жамоалари биринчи ва иккинчи ўринга чиқиб олган. Ўзбекистонлик ҳарбий хизматчилар эса кучли учликка киришга муваффақ бўлган.
Шунингдек, 13 август куни Москва вилоятидаги «Алабино» полигонида Ўзбекистон жамоаси «Танк биатлони» мусобақасининг иккинчи дивизионидаги ярим финал баҳсларида юқори натижа кўрсатиб, финал босқичга чиқди.
Жорий йилда илк бор иштирок этган ўзбекистонлик танкчилар иккинчи дивизионнинг 15 август куни бўлиб ўтадиган финал баҳсларида биринчилик учун курашади. Биринчи дивизион ғолиблари эса 17 август «АрМИ—2019» халқаро армия ўйинларининг ёпилиш кунида аниқланади.
Изоҳ (0)