Божхоначилар томонидан йил бошидан буён 11 минг литрдан зиёд спирт ва алкоголли ичимликларни ноқонуний олиб кирилишига чек қўйилган. Бу ҳақда давлат божхона қўмитаси матбуот хизмати хабар қилди.
Фуқаролар турли хил йўллар билан Ўзбекистон ҳудудига умимий қиймати 4 миллион сўмдан 55 миллион сўмгача бўлган спиртли ичимликлар олиб киришга уринган.
«Тошкент-АЭРО» ихтисослаштирилган божхона комплекси ходимлари томонидан Тошкент халқаро аэропортида аниқланган божхона қоидабузарлигида Москвадан учиб келган йўловчилардан бири 15 литр алкоголли ичимликларни яширинча олиб киришга урингани фош бўлди.
Н.Ш. исмли ушбу шахс ароқ, мартини, виски каби 15 шиша ичимликни «яшил йўлак»дан олиб ўтишга уринган. Уларнинг умумий қиймати салкам 4 миллион сўмни ташкил қилмоқда.
Сирдарё вилояти божхона бошқармаси «Сирдарё» чегара божхона пости орқали қўшни давлатдан кириб келган фуқаро I.А. бошқарувидаги юк автотранспорт воситаси ичидаги елим идишларнинг бирига 12 литр ароқ, иккинчига эса 4 литр коняк қуйилгани маълум бўлди.
Мазкур постда муқаддам аниқланган яна бир қонунбузарлик ҳолатида фуқаро Б.Б. бошқарувидаги юк автотранспорт воситасининг юкхонаси кўздан кечирилди. Натижада, юкхонага божхона ходимининг оғзаки сўровида айтилмаган, йўловчи божхона декларациясида кўрсатилмаган умумий қиймати 36 миллион сўмлик, сиғими 1 литрлик жами 36 дона Жаcк Даниэлс вискиси ортилганлиги аниқланди.
«Уфа—Тошкент» поэзди йўловчиси У.Ш. олиб кириш тақиқланган бўлишига қарамай, елим идишларга қадоқланган 10 литр этил спиртини олиб киришга уринган вақтида тўхтатиб қолинди.
«Москва—Тошкент» поэзди вагонларидан бирида эса фуқаро Н.Ж. яширинча олиб кириш учун 2 турдаги 18 литр ароқларни вагон ҳожатхонасига яширгани фош бўлди.
Тошкент вилояти божхона бошқармасининг «Ғишткўприк» чегара божхона постида фуқаро Э.А. қўшни давлатдан кириб келаётган 24 нафар пиёдани ёллаган ҳолда гўёки шахсий фойдаланиш учун ниқоби остида салкам 14 миллион сўмлик 131 шиша алкоголли ичимликни олиб киришга уринган. Тўхтатиб қолинган 14 турдаги коняр ва ароқларнинг умумий ҳажми эса 70 литрдан зиёддир.
«С.Нажимов» чегара божхона постида аниқланган яна бир ҳолатда эса қўшни давлатдан кириб келган фуқаро С.У. бошқарувидаги юк автотранспорт воситасига 52 шишада жами 32 литр виски ва ароқ яширилганлиги фош бўлди. Божхона назоратидан яширинча олиб кириш вақтида тўхтатиб қолинган мазкур алкоголли ичимликларнинг умумий қиймати 12,2 миллион сўмни ташкил қилмоқда.
Тахиатош туманида ўтказилган тезкор тадбир давомида А-380 автомобиль йўлида ҳаракатланиб кетаётган Volkswagen русумли автомобиль тўхтатилиб, кўздан кечирилганида, ушбу автоулов салони ва унга бириктирилган тиркамасида чет элда ишлаб чиқарилган ва божхона расмийлаштирувидан ўтганлигини тасдиқловчи ҳужжатлари бўлмаган қиймати 55 миллион сўмлик 181 дона шиша идишдаги жами 179,8 литр алкогол (виски ва коняк) маҳсулотлари борлиги аниқланган.
Изоҳ (0)