Мисрда бундан 3,3 минг йил олдин яшаган фиръавн Тутанҳамоннинг олтин суви юритилган саркофаги реставрация қилинмоқда, деб хабар беради «Korrespondent.net».
Гиза пирамидасидаги янги Миср музейи устахонасига реставрация жараёнларини ёритиш учун бир қатор журналистлар таклиф этилган.
Саркофаг ёш ҳукмдорнинг Луксордаги хилхонасидан олиб кетилганига бир ой бўлди. Говард Картер томонидан топилган мазкур қабр салкам юз йилдан буён биринчи маротаба Қоҳирага олиб келинган.
Миср қадимий обидалар ишлари бўйича вазири Ҳолид ал-Аннанининг айтишича, реставрация ишлари салкам саккиз ой давом этади.
«Бу Тутанҳамоннинг учинчи саркофаги бўлиб, у 12 июль куни хилхонадан икки сабабга кўра олиб чиқилди: биринчидан, мазкур саркофаг бошқа иккита саркофаг ҳамда бошқа хазиналар билан биргаликда кейинроқ намойишга қўйилади, иккинчидан, саркофаг реставрацияга муҳтож», — дейди вазир.
Изоҳ (0)