Қашқадарё ҳокими бузилаётган уй ичидан бақираётган болалар билан боғлиқ ҳодиса қачон ва қандай содир бўлганини маълум қилди

4 август куни Қашқадарё вилояти ҳокими Зафар Рўзиев Яккабоғ туманининг «Эски Яккабоғ» қўрғончасида бўлиб, тадбиркор ва ҳоким ўринбосари ўртасидаги можаро учун журналистлар ва блогерлар орқали халқдан кечирим сўради. Ҳоким Яккабоғ туманида содир бўлгани тахмин қилинган яна бир «снос» ҳақидаги видео билан боғлиқ ҳақиқатни очиқлади, дея хабар беради «Дарё» мухбири.

Зафар Рўзиев 4 август, якшанба куни «Эски Яккабоғ» қўрғончасидаги 2-сонли Болалар ва ўсмирлар спорт мактабида вилоятда фаолият юритувчи журналист ва блогерлар билан мулоқотга киришиб, тадбиркор ва туман ҳокими ўринбосари воқеаси учун халқдан узр сўраган. Вилоят ҳокими Яккабоғ воқеасида асосий айбдор ўзи эканлигини айтиб, Эски Яккабоғдаги «Обод қишлоқ» Давлат дастури унинг фармойишига кўра амалга оширилганлигини, бундан на Президент ва на ҳукумат раҳбари хабардор қилинмаганлигини таъкидлади. Ўзбошимчалик бугун ўзига қимматга тушаётганлигини инкор этмади.

Вилоят ҳокими «Дарё» мухбирининг тадбиркор ва ҳоким ўринбосари воқеалари давом этаётган бир пайтда интернетда Яккабоғ туманида бўлгани тахмин қилинган яна бир видео тарқалгани, видеода ёш болалар уйи бузилишига қаршилик кўрсатгани кўрингани, аммо ушбу воқеага нима учун муносабат билдирилмаганлигини сўради.

Зафар Рўзиев видеодаги воқеа 1 май куни Эски Яккабоғ ҳудудида бўлганини, уй эгаси ўша куни спиртли ичимлик ичиб келгани боис ИИБ ходимлари уй эгасини уйдан чиқаришга уринганини, шунда уй эгасининг фарзандлари бундан қўрқиб кетиб, ИИБ ходимларига қаршилик кўрсатганини айтди.

Яккабоғ тумани ҳокимлиги матбуот хизмати раҳбари Бозор Азизовнинг қўшимча қилишича, видеодаги ёш болалар уйи бузилган фуқаро Зафар Жўраевнинг 10 ва 12 ёшли фарзандлари.

Вилоят ҳокимининг айтишича, Зафар Жўраевнинг бузилган уйи учун компенсация пули тўлаб берилган.

Касби туман ҳокимлиги матбуот хизмати раҳбари Фахриддин Бозоров тадбиркор Баҳриддин Исомовнинг фарзанди Муҳаммадрўзи Даминовга куч ишлатган ИИБ ходимларига нисбатан чора кўрилган ёки кўрилмагани билан қизиқди. Вилоят ҳокими бу саволга жавоб берар экан, айбдорларга албатта жазо берилишини таъкидлади.

Мулоқот сўнгида вилоят ҳокими туман ҳокимлиги матбуот хизмати раҳбарлари билан ҳам якка тартибда мулоқот ўтказди.