Ахборот ва оммавий коммуникациялар агентлигида Ўзбекистон иқтисодиётига инвестицияларни жалб қилиш масалаларига бағишланган матбуот анжумани бўлиб ўтди. Бу ҳақда Ахборот ва оммавий коммуникациялар агентлиги хабар берди.
Ўзбекистон Республикаси Инвестициялар ва ташқи савдо вазирлиги мутасаддилари 2 хил инвестиция таклифи мавжуд эканини маълум қилди. Яъни, биринчи ҳолатда — тўғридан-тўғри, иккинчи ҳолатда эса — давлат-хусусий шериклик асосида хорижий ва маҳаллий сармоядорлар турли соҳаларни ривожлантириш мақсадида жалб қилинади.
«Жорий йилда 86 та истиқболли инвестиция таклифлари ишлаб чиқилган бўлиб, улардан 12 таси бўйича лойиҳалар тайёрланган, 4 та лойиҳа таклифи 2020—2022 йилги инвестиция дастурига киритилган, 3 лойиҳани эса молиялаштириш учун инвесторлар жалб қилинмоқда, қолган 62 та лойиҳа таклифи Инвестиция ва ташқи савдо вазирлиги томонидан ўрганиб ишлаб чиқилмоқда. 2020 йилнинг март ойи бошларида инвестицияларни жалб қилиш ва Ўзбекистоннинг иқтисодий салоҳиятини намойиш этиш мақсадида Тошкентда Халқаро форум ўтказиш режалаштирилмоқда», — деди Инвестиция дастурларини йиғиш ва мониторинг қилиш бошқармаси бошлиғи Зафар Хўжаев.
Вазирлик вакилларининг таъкидлашича, жорий йилнинг биринчи ярмида инвестицияларнинг умумий ҳажми 101 триллион сўмни ташкил этган.
«Уларнинг 5,6 миллиард доллари хорижий инвестициялардир. 2,1 миллиард доллар хорижий инвестициялар давлат кафолати асосидаги, 3,5 млрд доллар эса тўғридан-тўғри инвестиция ва кредитлар. 2018 йилнинг шу даври билан таққослайдиган бўлсак 4,3 баравар ўсишни кузатиш мумкин. Яъни, Ўзбекистон иқтисодиётига жалб қилинган инвестициялар ҳажми сезиларли ошмоқда. Агар бу кўрсаткичлар маҳаллий миллий маҳсулотлар билан таққосланса, инвестициялар ялпи ички маҳсулотнинг 47 фоизини ташкил этади. Ўтган йилда бу кўрсаткич тахминан 32 фоизни ташкил этган. Тўғридан-тўғри хорижий инвестициялар ялпи ички маҳсулотнинг 14 фоизини ташкил қилади. Давлат кафолати остида жалб қилинган хорижий инвестициялар ҳажми эса 3,6 баравардан иборат», — деди Халқаро ҳамкорликни таҳлил қилиш ва режалаштириш Бош бошқармаси бошлиғи Ойбек Ҳамроев.
Изоҳ (0)