Тошкент шаҳар Юнусобод туман ИИБга 26 июль куни тушган ҳужжатларга кўра, шу йил июнь ойида Юнусобод тумани 14-даҳада яшовчи 59 ёшли Б.Қ. ва М.Улуғбек туманида яшовчи «Яксарт Азиа» МЧЖ раҳбари, 46 ёшли Ш.Ж. фирибгарлик жиноятини содир этган.
ИИВ Жамоатчилик ва ОАВ билан алоқалар бошқармасининг ёзишича, улар Бухоро шаҳрида яшовчи 37 ёшли А.Б.га чет эл компанияларидаги бизнес ҳамкорлари орқали хорижий банклардаги ҳисоб рақамларидаги пул маблағларини ечиш учун ҳамда уч ой ичида 350 000 доллар қилиб қайтариб бериш шарти билан ундан 20 000 долларни олган.
Шунингдек, Москвадан 20 дона Mercedes-Benz микроавтобусларини олиб келиб, 10 донасини А.Б.га беришларини айтиб, алдов йўли билан ундан бўлиб-бўлиб, жами 159 000 долларни олган. Аммо улар берган ваъдаларини бажармай, пулларни ўз эҳтиёжлари учун ишлатиб юборган.
Ҳолат юзасидан жиноят иши қўзғатилиб, Б.Қ. ва Ш.Ж. ушланган. Тергов ҳаракатлари олиб борилмоқда.
Изоҳ (0)