Жорий йилнинг 25—27 июль кунлари Сурхондарё вилоятида Ўзбекистон Республикаси Президентининг 2019 йил 3 майдаги «Маънавий-маърифий ишлар самарадорлигини ошириш бўйича қўшимча чора-тадбирлар тўғрисида»ги қарорида белгиланган вазифалар ижроси доирасида «Маънавият фестивали» ўтказилмоқда, бу ҳақда Сурхондарё вилояти ҳокимлиги матбуот хизмати хабар қилади.
Маънавий тарғибот ишларининг сифати ва самарадорлигини оширишга қаратилган мазкур фестиваль доирасида шаҳар ва туманларда ғоят қизиқарли ва ранг-баранг тадбирлар, учрашувлар, тақдимот маросимлари ва хайрия акциялари ташкил этилмоқда.
Хусусан, вилоят ҳокими, вилоят Маънавият ва маърифат Кенгаши раиси Тўра Боболов ҳамда ижодкор зиёлилар, олимлар, педагоглар, фаол ёшлар вакиллари иштирокида бўлиб ўтган Кенгаш йиғилишида унинг Кенгаш қошида «Маърифат» тарғиботчилар жамияти ташкил этилганлиги эълон қилиниб, жамият аъзоларига кўкрак нишони ва аъзолик гувоҳномалари топширилди.
ННТ шаклидаги вилоят «Маърифат» тарғиботчилар жамияти аъзолари давлат ва жамоат ташкилотлари вакиллари, олимлар, мутахассислар, ижодкор зиёлилар орасидан шакллантирилган бўлиб, воҳада маънавий-маърифий ишлар самарадорлигини янада ошириш, мамлакатда барча жабҳаларда амалга оширилаётган ислоҳотлар, қабул қилинаётган қонун ҳужжатлари, давлат дастурлари мазмун-моҳиятини аҳолининг кенг қатламига етказиш жамият фаолиятининг муҳим йўналишларидан бири саналади.
Видеоселектор шаклида ўтказилган Кенгаш йиғилишида маънавий-маърифий ва тарғибот-ташвиқот ишларининг таъсирчанлиги ва самарасини янада ошириш билан боғлиқ вазифалар ҳақида сўз юритилди.
Вилоят, шаҳар ва туман студияларида иштирок этган вилоят ҳокимлиги аппарати масъул ходимлари, шаҳар ва туманлар ҳокимлари, корхона, ташкилот ва муассасалар раҳбарларига маънавий-маърифий ишларни замон билан ҳамоҳанг йўлга қўйиш, бу соҳага оид амалий ишларнинг натижадорлигини таъминлаш юзасидан тегишли топшириқлар берилиб, зарур чора-тадбирлар белгилаб олинди.
Кенгаш йиғилишида Республика Маънавият ва маърифат маркази раҳбарининг биринчи ўринбосари, профессор Муҳаммаджон Қуронов иштирок этди.
Изоҳ (0)