Самарқанд вилоятида аёл ароқхўр эрини уриб ўлдирди

Пахтачилик У. Ў. турмуш ўртоғи Э. Ў. (марҳум) билан тақдирини боғлаганда унинг хонадонида бир аёл киши орзу қилган бахтни кўраман, бир аёлдан кутган меҳрни бераман, дея орзу қилганди. Минг афсус, эрининг субутсизлиги, ароқнинг касофати барчасини чилпарчин қилди. Бу ҳақда Zarnews жиноят ишлари бўйича Самарқанд вилоят суди судьяси И.Ҳамидовга таяниб хабар қилмоқда.

Улар турмуш қурганидан бир йил ўтгач, Э.Ў. кўп ичадиган одат чиқарди. Бу ҳам етмагандай ичиб келганида турли баҳоналар билан уйида жанжал чиқариб, хотинини дўппосларди.

Орадан уч йил ўтиб Э.Ў. ёз ойларининг бирида Наманган вилоятига ишлашга кетди. Кўп ўтмай рўзғорини тебратиш учун оила бошлиғидан пул кутиб турган хотин эрининг ким биландир уришиб уни ўлдириб қўйганлиги учун қамалганлиги ҳақида хат олди.

Э.Ў. жазо муддатини ўтаб, уйга қайтгач хотини эрининг ёмон одатларини ташлаб яхшилик томон ўзгарганига умид қилди. Аммо у тузалиш йўлига ўтмаганди. Э.Ў. уйга келганидан сўнг яна ичкиликбозликни давом эттирди. Маст ҳолатда бировнинг машинасини олиб қочиб қамалди.

Бу гал озодликка чиққанида ҳам у хатоларидан тўғри хулоса чиқармади. Ҳар куни ичиб келиб хотин бола-чақасини уриш одатини ташламади.

Бундай азоб-уқубатларга чидай олмаган У. Ў. бир куни ИИБ ходимларига мурожаат қилди. Улар келганида Э.Ў. ўзини ухлаганга солиб ётарди. ИИБ ходимлари кетганидан сўнг эри «Сен ҳали мелиса чақирадиган бўлдингми?», деб У.Ў.ни баттар дўппослади. Шундан сўнг аёл ИИБ ходимларига қайта мурожаат қилмади. Аёл эрини ташлаб отасиникига кетмоқчи ҳам бўлди, аммо эрининг бир кун тузалишига умид қилиб, қолаверса, фарзандлари тирик етим бўлиб қолмаслиги, оиласини сақлаб қолиш учун барча азоб-уқубатларга чидаб келди.

Аммо Э.Ў.нинг сўнгги ҳаракати У.Ў.ни эрининг қотилига айланишига сабаб бўлди. Қиш кунларининг бири У.Ў. шифохонага бориб, ойлик маошини олиб уйига қайтди. Бу пайтда эри бир-иккита улфатлари билан ичиб ўтирарди. Улфатлари кетгач Э.Ў. хотинига дўкондан ароқ олиб келишни буюрди. Аёл ароқ олиб келса, эри яна баттарроқ жанжал қилиши мумкинлигини ўйлаб, ароқ сотиб олмасдан кўчада бироз айланиб юрди. Аммо тезроқ бормаса фарзандларининг азоблашини ўйлаган аёл бир шиша ароқ олиб уйига борди. Уйига келса эри ичиб ўтирган эди. Эркак эшикдан кирган хотинини кўриб, уни ҳақоратлай бошлади. Эрининг разил қилиқлари ҳалқумига келган У.Ў. жаҳл устида ароқ шишаси билан эрининг бошига урди. Э.Ў. шиша зарбидан ҳушини йўқотади. У. Ў. эрининг ҳозир мастлиги, ҳушига келса уришидан қўрқиб, совуқда ташқарига чиқариб қўяди.

Оқибатни қаранг, бир оила парчаланиб,  уч бола уйда отасиз қолди.