Электр тармоқларини модернизация қилиш ишлари режа асосида бажарилмаётгани молиявий узилишлар билан боғлиқ. Бу ҳақда 24 июль куни «Ҳудудий электр тармоқлари» АЖ раиси ўринбосари Феруз Қурбонов журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Қурбоновнинг айтишича, йил охирга қадар режалаштирилган 7,1 минг километр эмас, Президент Шавкат Мирзиёев томонидан 8 минг километрдан ортиқроқ электр узатиш тармоқларини модернизация қилиш ҳамда 3,5 мингдан ортиқроқ трансформатор пунктларини ўрнатиш вазифаси қўйилган.
«Ишда озгина оқсоқликларга йўл қўйганмиз, тўғри. Режа жадвалидан анча орқадамиз. Бунинг ҳам объектив, ҳам субъектив сабаблари бор. Мисол учун, «Ўзбекэнерго» АЖнинг учга бўлиниши, молиявий оқимларнинг бир муддатга тўхтаб қолиши билан боғлиқ», — деди Феруз Қурбонов.
Ҳозирда мавжуд муаммоларга қарамай, Қурбоновнинг қўшимча қилишича, йил охирга қадар режани ортиғи билан бажариш мақсад қилинган.
Таъкидланишича, 2019 йил давомида талабдан келиб чиқиб 450 километрдан зиёдроқ электр узатиш тармоқлари ҳамда 565 дона трансформатор ўрнатиш кўзда тутилган. Бугунги кунда 165 километр электр узатиш тармоқлари ва 88 дона янги трансформатор ўрнатилган.
Изоҳ (0)