Польшанинг Collegium Humanum – Варшава менежмент университети ректори Павел Чарнецки Андижон шаҳрида университет филиалини очиш таклифи билан чиқди. Бу ҳақда «Дарё» мухбири хабар бермоқда.
Вилоят ҳокимлигининг маълум қилишича, 22 июль куни ҳокимлик биносида Андижон вилояти ҳокими Шуҳратбек Абдураҳмонов мазкур олий таълим муассаси делегациясини қабул қилган. Унда меҳмонлар томонидан халқаро таълим стандартлари асосида кадрлар тайёрловчи олий ўқув юртини биргаликда айнан Андижонда ташкил қилиш таклифи илгари сурилган.
— Таълим даргоҳимиз Польшанинг етакчи хусусий университетлари қаторидан жой олган бўлиб, мамлакатнинг ўзида 23 та филиалга эга, – дейди университет ректори, профессор Павел Чарнецки. — Шунингдек, Европа Иттифоқига кирувчи қатор давлатларда ҳам бўлимларимиз очилган. Таълим нархи нисбатан арзон, талабалар учун турли грантлар ва чегирмалар кўзда тутилган. Малака ошириш, тажриба алмашиш, амалиёт ўташ учун барча имкониятлар яратилган. Ўйлаймизки, университетимиз инфратузилмани ривожлантириш, ҳудуддаги ижтимоий сиёсатдаги иштироки орқали самара келтириши мумкин.
Изоҳ (0)