Марказий ҳарбий округ қўмондонлиги, Самарқанд вилояти ҳокимлиги ҳамда Халқ таълими бошқармаси билан ҳамкорликда вилоятдаги 1214 та мактабда ҳарбий ватанпарварлик ва ўқув қуролларини сақлаш учун махсус хоналар ташкил этилмоқда. Бу ҳақда Марказий ҳарбий округ матбуот хизмати хабар берди.
Эндиликда мактабларда ёшларни чақирувга қадар тайёрлаш фани хонаси махсус воситалар билан жиҳозланиб, эскича қолиб ва ёндашувлар бутунлай воз кечилади.
Бундан бир неча йил олдин мамлакатнинг барча ҳудудларидаги мактабларда 10, 11-синфларнинг тугатилиши билан ўқув қуроллари ва ҳарбий аслаҳалар макетлари ҳамда қуроллардан ўқ отиш хоналари ёппасига йиғиштириб олинганди.
Ёшлар ҳарбий хизмат ҳақида тўлиқ тушунчага эга бўлмай, «Ватанпарвар» кўрсатувини кўриб, ўқитувчилар томонидан ўтилган мавзуларни тасаввурига келтириб, армияга боришга одатланди.
Яқин икки йил ичида эса «Халқ ва армия якдил» деган шиор ўз маъносида ишлатила бошланди. Ҳарбий техникалар паради ўтказилди, армия куч-қудрати намойиш этилиб, ёшларни ватанпарварлик руҳида тарбиялаш тизими йўлга қўйилди.
Ҳозирги вақтга келиб Самарқанд шаҳридаги мудофаа ишлари бошқармаси ҳамда вилоят ҳокимлиги билан ҳамкорликда қарийб 1 миллиард сўмлик буюк сиймолар ҳамда қурол-аслаҳа тавсифи акс этган стендларнинг бир қисми 200 дан зиёд мактабларга етказилди. Ўқув қуроллари, ҳарбий аслаҳалар макети ва бошқа турдаги воситаларни етказилиш муддатлари ҳақида келишиб олинди.
Шунингдек, вилоятдаги умумтаълим мактаблардаги чақирувга қадар бошланғич тайёргарлик синф хоналарининг ўқув моддий базалари ўрганилиб, зарурий воситалар билан таъминлаш қаторида, ҳарбий хизматчилар томонидан Ватан ҳимояси йўлида жон фидо этган ўғлонларга бағишланган, жасорат ойнаси ташкил этилмоқда.
Изоҳ (0)